Superstari portugez i Manchester United, Cristiano Ronaldo, do të largohet nga klubi me vendim të menjëhershëm. Vendimi u bë i ditur në nga vet klubi nëpërmjet një deklarate zyrtare, disa ditë pas intervistës së famshme të sulmuesit. Ronaldo u shpreh pak ditë më parë se nuk ka respekt për trajnerin Ten Hag, si dhe kritikoi mjaft ashpër hierarkinë e klubit.
Në deklaratën për mediat, drejtuesit e United u shprehën:
“Klubi e falenderon atë (Ronaldon) për kontributin e jashtëzakonshëm përgjatë 2 periudhave në Old Trafford. I urojmë atij dhe familjes së tij më të mirën. Tek Manchester United mbetemi të gjithë të fokusuar për të vazhduar progresin e ekipit nën drejtimin e Erik ten Hag, dhe për të punuar së bashku që të sigurojmë suksesin në fushë.”
Sipas mediave angleze, largimi i Ronaldo u pranua në mënyrë konsensuale nga të dyja palët. United ndërkohë mban momentalisht vendin e pestë në Premier League, dhe duket se trajneri Ten Hag ka filluar të gjejë pak nga pak modelin e tij të lojës. Nga ana tjetër, është ende e paqartë se çfarë rezervon e ardhmja për Cristiano Ronaldon.
Sipas spanjolles Marca, portugezi po konsideron momentalisht 2 alternativa kryesore. Opsioni i parë është Newcastle United, ndërsa opsioni i dytë, i cili ka më pak shanse të konkretizohet, është një lëvizje drejt Al-Nassr në Arabinë Saudite.
Ndërkohë lajmi më i bujshëm është interesimi i Chelsea për kartonin e portugezit. Sipas mediave angleze, agjenti i sulmuesit, Jorge Mendes, është i gatshëm të diskutojë me londinezët për një marrëveshje mbi shërbimet e Ronaldo, duke qënë se blutë duken paraprakisht të interesuar. Pronari i klubit, Todd Boehly, pëlqen idenë e afrimit të superstarit në ekip, por lëvizja mbetet një operacion i komplikuar duke qënë se trajneri Graham Potter është skeptik mbi aftësitë e portugezit, në këtë moment të karrierës së tij.