Pavarësisht afrimeve të Cristiano Ronaldo, Raphael Varane dhe Jadon Sancho, drejtuesit e Manchester United ende nuk duken të kënaqur me ekipin e tyre aktual. Për këtë arsye, merkatoja e janarit pritet të jetë mjaft impenjative për “Djajtë e Kuq”, që do të kërkojnë të perforcojnë repartin e mesfushës.
Trajneri gjerman Ralf Rangnick i ka vënë syrin hollandezit Frenkie De Jong të Barcelonës. Mesfushori është një opsion perfekt për teknikun, që po kërkon të nisë procesin e rindërtimit të United, sipas modelit të tij modern të të luajturit futboll. Rangnick startoi me fitore aventurën e tij në Old Trafford, teksa të zotët e shtëpisë fituan me rezultatin 1-0 përballë Crystal Palace.
Por mesa duket, Rangnick nuk ishte 100% i bindur me performancën e mesfushorëve të tij. Sipas prestigjozes El Nacional, “Djajtë e Kuq” janë të prirur të paguajnë deri në 47 milionë paundë për kartonin e De Jong, mbase dhe më shumë, nëse tekniku gjerman jep aprovimin e tij. Kjo shifër është 18 milionë paundë më pak sesa çmimi që Barcelona i pagoi Ajax për shërbimet e mesfushorit. Por duke marrë parasysh formën e tij me luhatje në Spanjë, si dhe vështirësitë financiare të klubit, United shpreson që Barcelona të pranojë ofertën e 47 milionë paundëve.
De Jong ka zhvilluar 11 paraqitje në La Liga këtë sezon, duke shënuar 1 gol dhe 2 asiste. Trajneri i ri i Barcelonës, Xavi Hernandez, e ka bërë të qartë se beson fort tek aftësitë e mesfushorit. Planet e teknikut janë që të rindërtojë Barcelonën duke u bazuar tek talentet e reja, dhe hollandezi është një prej tyre.
United kërkon shërbimet e De Jong, duke marrë parasysh dhe një largim të mundshëm të Paul Pogba. Francezi është përfolur disa herë së fundimi për një transferim në Spanjë tek Real Madrid, apo dhe një rikthim tek Juventus në Itali.