Sipas burimeve të Football Insider, mesfushori i Juventus, Rodrigo Bentancur, është shumë afër largimit nga “Zonja e Vjetër”. Janë anglezët e Aston Villa që po përgatisin një ofertë të majme për shërbimet e lojtarit, dhe italianët duket se janë të prirur të pranojnë propozimin.
Aston Villa ka bërë ofertën e saj zyrtare, dhe një burim pranë klubit ka thënë se bëhet fjalë për rreth 18 milionë paundë. Besohet se dhe mesfushori uruguaian, është pozitiv për një lëvizje drejt Premier League, pasi ai admiron trajnerin e Villa, Steven Gerrard. Por Juventus duhet të gjejë më parë një zëvëndësues, përpara se të lërë të lirë Bentacur. Kjo gjë mund të shtyjë finalizimin e operacionit në ditët e fundit të merkatos së janarit.
Lojtari ka një kontratë aktive me Juventus deri në vitin 2024, por ekuilibrat në ekipin e Massimiliano Allegrit nuk e kanë favorizuar së fundmi. Ai ka zhvilluar 19 paraqitje me Juventus këtë sezon, duke regjistruar 2 asiste.
Villa ndërkohë e ka prioritet kryesor nënshkrimin me një mesfushor të ri këtë merkato. Kjo pasi Marvelous Nakamba pësoi një dëmtim të rëndë dhe iu nënshtrua një operacioni muajin e kaluar. Me shumë gjasa lojtari nuk do të jetë i gatshëm për një periudhë të gjatë, deri në 4 muaj, dhe Gerrard ka nevojë për opsione.
Ish-mesfushori i Premier League erdhi në krye të Aston Villa në nëntorin e vitit të kaluar. Që prej atëherë ai ka targetuar emra mjaft prestigjozë të arenës europiane, dhe gjithçka kulmoi me mbërritjen në klub të Coutinho dhe Lucas Digne. Ndër dëshirat e tjera të Gerrard është dhe Joe Gomez i Liverpool. Por Jurgen Klopp nuk e ka lejuar largimin e tij nga klubi. Villa mban momentalisht vendin e 11-të në Premier League, por objektivat e skaudrës mbeten mjaft ambicioze.