Prestigjozja GOAL ka konfirmuar se Robert Lewandowski nuk do të rinovojë kontratën e tij me Bayern Munich. Bomberi polak ka një marrëveshje të vlefshme deri në fundin e vitit të ardhshëm me bavarezët, por ai ka vendosur të largohet nga klubi në kërkim të një aventure të re. Gjatë javëve të fundit Lewandowski është përfolur për një transferim drejt Barcelonës, por ende nuk ka asnjë marrëveshje zyrtare me klubin spanjoll.
Por çfarë shkoi keq mes sulmuesit dhe drejtuesëve të Bayern?
Përpara 1 muaji, përfaqësuesit e klubit ishin mjaft kondifentë se do të arrinin një akord me Lewandowski për kontratën e re. Vet Oliver Kahn, CEO i Bayern Munich, deklaroi jo shumë kohë më parë:
“Me siguri do të kemi Robert me ne dhe për një sezon tjetër. Ne e dimë se çfarë marrëdhënie kemi me të dhe jemi të qetë. Mesa duket ka një kompeticion vërdallë se kush do të raportojë lajmin më pa sens për Lewandowski. Bisedimet do të vazhdojnë, ne nuk jemi të çmendur të mendojmë transferimin e një lojtari që shënon 30-40 gola çdo sezon…”
Por pakënaqësitë nga ana e lojtarit u bënë shumë shpejt publike, dhe lajmet rezultuan të vërteta. Ditën që Bayern triumfoi në Bundesliga, Lewa u shpreh për mediat:
“Do të kemi një mbledhje së shpejti por asgjë speciale nuk ka ndodhur deri më tani. Edhe une e dalloj se çfarë po ndodh… Situata nuk është e lehtë as për mua.”
Situata e krijuar ka vendosur në një pozicion mjaft të vështirë Bayern, që duhet të bëjë një zgjedhje; të shesë futbollistin më të mirë gjatë merkatos së verës, apo ta humbasë atë me kosto zero në fund të sezonit të ardhshëm. Gjithsesi, duket se shumëçka do të varet nga vet vullneti i lojtarit për t’iu bashkuar një ekipi tjetër.