Në një intervistë të fundit për Bein Sports, ish-trajneri dhe legjenda e Arsenal, Arsene Wenger, ka kritikuar zgjedhjet e Luis Enrique për kombëtaren spanjolle të Euro 2020. Sipas Wenger, është i pabesueshëm fakti që trajneri i Spanjës, nuk ka grumbulluar në ekipin e tij asnjë lojtar nga gjigandët e Real Madrid. Duke i dhënë rëndësi këtij konstatimi, Wenger u shpreh skeptik për një sukses të mundshëm të La Furia Roja në Euro.
Që prej fitores së 3 kompeticioneve madhore rradhazi (2 Europiane dhe 1 Botëror), kombëtarja spanjolle ka pësuar rënie, duke dështuar të impresionojë në Europianin e 2016 apo Botërorin e fundit. Në një situatë të tillë, vendimi i Luis Enrique për të mos përfshirë asnjë lojtar të Real Madrid në 24-shen spanjolle të Euro 2020 ka shkaktuar debate. Megjithëse Los Blancos nuk ishin në lartësinë e duhur sezonin që lamë pas, kualiteti i lojtarëve të tyre është i padiskutueshëm. E njejta gjë mund të thuhet dhe për Barcelonën. Katalanasit kaluan një sezon të vështirë, por disa lojtarë të klubit u përfshinë në listën e Spanjës nga Enrique.
Në të kaluarën yje madrilenë si Sergio Ramos, Iker Casillas dhe Xabi Alonso kanë qenë shtylla e kombëtares spanjolle dhe katalizatorët e suksesit në arenën ndërkombëtare. Arsene Wenger u shpreh për situatën:
“Spanja do të shkojë në një kompeticion madhor pa lojtarë të Real Madrid? E pabesueshme! Mendoj se ka të bëjë me momentin, Real Madrid është dobësuar, Barcelona është dobësuar, dhe si rrjedhim, dhe Spanja është dobësuar. Do të ishte një surprizë e madhe nëse ata (Spanja) do të arrinin të fitonin Europianin. Por nuk shikon më të njejtën fuqi, dominancë dhe vetbesim që kanë pasur më përpara.”
Pavarësisht kritikave, trajneri Luis Enrique është shfaqur optimist. Ai ka deklaruar:
“Më duhet të bind lojtarët, por personalisht jam i bindur se do të jemi një ekip mjaft i vështirë për t’u mundur. Mund të gabohem, por besoj se jemi në 6 ose 7 skuadrat favorite për të fituar trofeun.”