Corentin Tolisso ka qenë së fundmi në vëmendjen e disa klubeve të rëndësishme angleze, siç raporton gjermanja Bild. Arsenal, Manchester United dhe Tottenham mësohet se kanë shprehur interes për mesfushorin, me këta të fundit që duken më afër një oferte zyrtare financiare. Ndërkohë Bayern Munich kërkon rreth 10 milionë euro për francezin. Nëse transferimi mbyllet me sukses, këto para pritet të jenë një ndihmë për transferimin e Marcel Sabitzer, objektiv ky kryesor për bavarezët.
Ndërkohë në Francë, PSG mund të shesë deri në 10 lojtarë nga ekipi i parë, për të balancuar financat pas afrimit në klub të Lionel Messit. Mes lojtarëve që mund t’i largohen ekipit janë: Idrissa Gueye, mesfushori Ander Herrera, dhe 28 vjeçari argjentinas Mauro Icardi. Por, të rrezikuar janë dhe Sergio Rico, Areola, Kurzawa dhe Sarabia. Gjithsesi, drejtuesit e klubit francez nuk duken të shqetësuar, pasi besojnë se imazhi i Lionel Messit dhe vlera komerciale e tij, do të rikthejnë shumë shpejt paratë e harxhuara për transferimin e futbollistit në Paris.
Zhvillime mjaft interesante vijnë dhe nga Anglia, teksa Paul Pogba pritet t’i bashkohet PSG sezonin e ardhshëm, me kosto zero. Mesfushori do të qëndrojë në Old Trafford dhe për 1 vit, teksa dëshira e tij për t’iu bashkuar parizienëve, u bë e pamundur nga transferimi i beftë i Lionel Messit. Agjenti i futbollistit, Mino Raiola ishte në bisedime të vazhdueshme për arritjen e një marrëveshjeje këtë verë, por një transferim tjetër pas atij të argjentinasit do të rezultonte shumë i shtrenjtë, edhe për pronarët super të pasur të PSG.
Në Angli, Arsenal është në pritje të Martin Odegaard. 22 vjeçari duhet të vendosë mes një qëndrimi në Madrid, ku nuk e ka aspak të sigurt vendin e titullarit, apo një transferimi përfundimtar në Londër. Kujtojmë se lojtari ishte pjesë e ekipit të Arteta, në gjysmën e dytë të sezonit të kaluar në formën e huazimit. Paraqitjet pozitive duket se kanë bindur drejtuesit e “Topçinjëve” për të konsideruar afrimin e lojtarit në ekip.