Tottenham Hotspur ka zyrtarizuar afrimin e Ange Postecoglou si trajner të ri të ekipit. Australiani do të jetë në krye të pankinës së londinezëve për 4 vitet e ardhshme, teksa u largua nga Celtic pas sukseseve të njëpasnjëshme në kampionat. Presidenti i Tottenham, Daniel Levy komentoi afrimin e Postecoglou në një deklaratë për mediat:
“Jemi shumë të gëzuar që kemi Ange mes nesh. Ange sjell një mentalitet pozitiv dhe një stil loje sulmuese të shpejtë. Ai ka një rekord të fortë me arritje, dhe zhvillimin e lojtarëve, si dhe kupton mirë rëndësinë akademisë së klubit…”
Postecoglou do të jetë trajneri i parë australian që drejton një ekip në Premier League. Gjatë drejtimit të Celtic, tekniku fitoi 5 nga 6 trofetë e mundshme në 2 sezone. Drejtori ekzekutiv i klubit skocez, Michael Nicholson, gjithashtu shprehu mirënjohjen e tij për punën e trajnerit gjatë këtyre dy viteve. Nicholson u shpreh:
“Ka qënë një kënaqësi të punosh me Ange, një trajner shumë i zoti dhe një njeri i mirë. Ai i ka shërbyer klubit me energji, determinim, dhe ka arritur një nivel fenomenal suksesi. Sigurisht, dëshironim që Ange të qëndronte tek Celtic, dhe megjithëse zhgënjimi është real për ikjen e tij, ai ka vendosur se kërkon një sfidë të re, vendim që ne e respektojmë.”
Që prej vitit 2019, Tottenham ka siguruar vetëm 1 herë kualifikimin në Champions League, dhe bordi drejtues kërkon një rindërtim të ekipit. Kjo është dhe arsyeja kryesore se përse bordi vendosi të caktojë në rolin e trajnerit Ange Postecoglou. Ky i fundit mori drejtimin e Celtic në vitin 2021, kur këta të fundit gjendeshin 25 pikë prapa Rangers në kampionat.
Situata është e ngjashme tek Tottenham, por tekniku australian do të përballet me një sfidë shumë më të vështirë, pasi konkurrenca në Premier League është shumë më e fortë.