Arsenal ka zyrtarizuar afrimin e sulmuesit belg, Leandro Trossard nga skuadra e Brighton. Trossard do të jetë pjesë e londinezëve deri në vitin 2027 dhe kontrata e tij parashikon dhe mundësinë e rinovimit për 1 vit ekstra. Lojtari ka shënuar 7 gola dhe ka regjistruar dhe 3 asiste në 16 ndeshje me Brighton këtë sezon. Kartoni i tij do t’i kushtojë Arsenal 21 milionë paundë. Trajneri Mikel Arteta konfirmoi afrimin e Trossard dhe u shfaq i lumtur para mediave. Spanjolli komentoi:
“Ai e njeh kampionatin këtu dhe mendoj se mund të ketë një impakt të menjëhershëm në skuadër. Jemi shumë të lumtur që ai është tashmë pjesë e ekipit. Ai është një lojtar të cilin e kemi ndjekur prej kohësh dhe tani erdhi mundësia…kemi nevojë për një lojtar të tillë në sulm, i cili është i shkathët dhe mund të luajë në disa pozicione.”
Arteta shtoi:
“Duhet të mendojmë në planin afatshkurtër, por dhe atë afatmesëm dhe afatgjatë, dhe mendoj se ai (Trossard) na i ofron të gjitha. Ai është një lojtar mjaft inteligjent. Kur shikon karrierën e tij dhe atë që ka bërë në vitet e fundit, kupton se është një lojtar që i përshtatet stilit tonë të lojës…”
Sulmuesi belg e shprehu qartë dëshirën e tij për t’u larguar nga Brighton, teksa ditët e tij të fundit në klub u shoqëruan me polemika. Mësohet se Trossard pati një mosmarrëveshje me trajnerin Roberto de Zerbi dhe dyshja nuk mundi të gjente dot gjuhën e përbashkët. Ky lajm u konfirmua nga vet agjenti i futbollistit, Josy Comhair.
Në fitoren 3-0 ndaj Liverpool Trossard u la jashtë formacionit, si ndëshkim për faktin që la seancën stërvitore përpara kohe pa marrë leje. Tani mbetet të shohim se si do të jetë aventura e re e Tossard në Emirates.