Drejtuesit e Arsenal nuk do të lejojnë largimin e portierit Ramsdale në merkaton e janarit. Anglezi ka qënë i detyruar të qëndrojë në stol, që prej ardhjes në ekip të spanjollit Raya në merkaton e verës. Ky i fundit ka marrë vendin e titullarit dhe duket se është tashmë zgjedhja e parë e trajnerit Mikel Arteta. Megjithatë, shumë zëra brenda Arsenal nuk kanë qënë të bindur mbi paraqitjet e Raya në javët e tij të para në Emirates, dhe kjo është arsyeja se sipas tyre, Ramsdale nuk mund të largohet në janar.
Të dy portierët janë treguar të sinqertë mbi rivalitetin e tyre, duke shprehur dëshirën për të qënë titullarë. Megjithatë, si Raya, ashtu dhe Ramsdale janë shprehur se kanë një raport të mirë mes tyre dhe mbështesin vazhdimisht njëri-tjetrin. Arteta gjithashtu ka konfirmuar se dy portierët kanë një raport të mirë. Gjithsesi, situata e Ramsdale është delikate, dhe anglezi mund të fillojë të mendojë për largimin nga Arsenal nëse situata nuk ndryshon së shpejti.
Ndërkohë, shumë tifozë të klubit ishin që në fillim kundër afrimit të një portieri të ri nga Arteta. Sipas disa zërave brenda fansave, afrimi i Raya do të prodhojë probleme me vetëbesimin tek të dy portierët e Arsenal, duke qënë se do të jenë vazhdimisht në presion për të eleminuar gabimet e mundshme në fushën e blertë. Kjo mund të përfundojë duke pasur rezultate negative në performancën e Raya dhe Ramsdale.
Gjithsesi, duket se Ramsdale mund të rifitojë vendin e tij si titullar, pasi Arteta nuk ka ende ndërmend të heqë dorë prej tij. Interesimi nga klubet rivale në Premier League mbetet i madh për anglezin, por persona brenda rrethit të tij të afërt bëjnë me dije se Ramsdale është ende i gatshëm të luftojë për vendin e tij të titullarit.
