Drejtuesit e Arsenal janë të vendosur të përmirësojnë repartin e sulmit gjatë merkatos së janarit, teksa trajneri Mikel Arteta dhe klubi janë në kërkim të trofeut të parë në Premier League, prej 18 vitesh.
Objektivi kryesor i londinezëve në merkaton e janarit do të jetë sulmuesi i Brentford, Ivan Toney. Mësohet se palët janë që tani në bisedime, sipas mediave angleze, dhe trajneri Mikel Arteta po luan një rol të rëndësishëm në negociata. Chelsea gjithashtu mësohet se është i interesuar për kartonin e Toney. Në Stamford Bridge, drejtuesit e klubit i kanë dhënë dritën jeshile trajnerit Mauricio Pochettino për të sjelë një sulmues me eksperiencë në ekip. Megjithatë, mësohet se Arsenal është shumë më pranë arritjes së një marrëveshjeje me bomberin e Brentford.
Burime pranë lojtarit bëjnë me dije se Ivan është një fans i futbollit që Arsenal po luan nën drejtimin e Arteta. Drejtuesit e klubit ndërkohë janë të gatshëm të hidhen në sulm, duke qënë se brenda skuadrës ekziston ideja se Arsenal i mungon vetëm një sulmues i mirëfilltë për të garuar për titullin kampion në Premier League. Momentalisht, Eddie Nketiah, Gabriel Jesus dhe Kai Havertz kanë provuar të luajnë në rolin e sulmuesit, por kanë shënuar vetëm 4 gola gjithsej mes tyre.
Brentford shpreson të përfitojë 80 milionë paundë për kartonin e Toney në janar, megjithatë, brenda Arsenal ka informacione të brendshme që besojnë se një marrëveshje mund të arrihet dhe për një shumë më të vogël.
Për momentin Toney është jashtë fushave të blerta, pas dënimit për vënien e basteve të jashtëligjshme. Lojtari pritet të rikthehet në janar, në të njejtin moment kur hapet dhe merkatoja. Kjo do të thotë se ekziston mundësia që Toney të mos kthehet më në fushën e blertë për Brentford, në rast se kalimi tek Arsenal finalizohet.