Declan Rice preferon një lëvizje tek Arsenal, por duket se West Ham nuk do ta lërë të lirë aq lehtë asin e tyre. Sipas The Sun, klubi është i interesuar në një shkëmbim lojtarësh, nëse Rice kërkon të luajë për Arsenal. West Ham kërkon që në marrëveshje të përfshihet dhe kartoni i Emile Smith Rowe, i cili nëse transferimi bëhet realitet, do të luajë për West Ham.
Burimet pranë klubeve bëjnë me dije se trajneri i West Ham, David Moyes, është një adhurues i Smith Rowe, por tekniku i Arsenal, Mikel Arteta, është në mëdyshje për të hequr dorë prej lojtarit të tij. Drejtuesit e West Ham e dinë se interesi për Rice është i lartë, dhe janë në një pozicion mjaft të mirë për të negociuar.
Moyes e di mirë se Declan Rice është i pazëvëndësueshëm për klubin, por një talent si Smith Rowe mund të ndihmojë në rindërtimin e klubit pas largimit të Rice. Lojtari i Arsenal nga ana tjetër nuk është më një favorit kryesor për një vend titullari në ekipin e Artetës, dhe kjo do të shtyjë akoma më shumë drejtuesit e West Ham për të shtyrë propozimin e tyre.
Arteta mund të jetë i detyruar që në fund të heqë dorë prej Smith Rowe, duke qënë se Rice është objektivi kryesor i merkatos së verës. Për më shumë, konkurrenca për mesfushorin do të jetë e fortë nga Manchester United dhe Bayern Munich, dy klube prestigjoze që gjithashtu janë në gjendje t’i ofrojnë Rice vendin e titullarit në ekip. Gjithsesi, duke qënë se Rice preferon të luajë në Premier League, dhe Manchester United nuk mund t’i garantojë lojën në Champions League sezonin e ardhshëm, lojtari është më i prirur drejt një lëvizje në Emirates.
Burime pranë mesfushorit thonë se Rice është i tërhequr nga ideja e ndërtimit të një ekipi të ri tek Arsenal, si dhe tek roli që ai mund të luajë në këtë drejtim.
