Sulmuesi i Barcelonës, Ousmane Dembele, ka pranuar t’i bashkohet PSG. Ky është lajmi i bujshëm i raportuar nga prestigjozja Foot Mercato në Francë. Gazetari sportiv Santi Aouna ishte nga zërat e parë që raportoi se Dembele ishte kthyer në një nga objektivat kryesorë të klubit parizien, dhe duket se tashmë marrëveshja është shumë afër finalizimit.
Përpara raportimit të Aouna, L’Equipe gjithashtu raportoi se Dembele kishte vendosur të largohej nga Barcelona. Sipas portalit të mirënjohur, vendimi i lojtarit erdhi pasi ai mësoi se Barcelona i kishte ofruar PSG kartonin e tij dhe atë të Gavi, si pjesë e një marrëveshje potenciale për kartonin e Kylian Mbappe. Ndërkohë tashmë është raportuar se Dembele do t’i bashkohet PSG deri në vitin 2028, pasi ka pranuar termat personale me klubin.
Tashmë transferimi mund të realizohet mjaft lehtë, duke qënë se PSG mund të aktivizojë klauzolën prej 50 milionë eurosh për prishjen e kontratës së Dembele, e cila është relativisht mjaft e vogël. Një tjetër goditje për klubin spanjoll është fakti se Dembele dhe agjenti i tij do të përfitojnë gati gjysmën e kësaj shume, në rast se PSG vendos të finalizojë marrëveshjen. Ky detaj ishte i parashikuar në kontratën e re që Dembele firmosi me katalanasit në vitin 2022.
Ndërkohë, presidenti i Joan Laporta është gati t’i “shpallë luftë” PSG nëse marrëveshja finalizohet. Laporta pretendon se klubi francez ka shkelur rregullat a fairplay-it financiar. 7 vite që prej largimit të Neymar nga Barcelona drejt PSG, parizienët kanë bërë të vetin një tjetër superstar të klubit spanjoll. Megjithatë, kësaj rradhe Barcelona pritet të përfitojë vetëm 25 milionë euro nga operacioni. E përkthyer ndryshe, gati 10 herë më pak se shuma e përfituar nga transferimi i Neymar para disa vitesh. Për brazilianin, PSG pagoi plot 222 milionë euro.