Drejtuesit e Barcelona janë duke menduar mundësinë e afrimit të Darwin Nunez në Camp Nou, gjatë merkatos së verës. Asi i Liverpool shihet si zëvëndësuesi perfekt për Robert Lewandowksi, i cili mund të largohet në fund të sezonit, për t’i dhënë klubit më shumë liri financiare.
Sipas detyrimeve të La Liga, paga që Barcelona duhet t’i paguajë të gjithë ekipit nuk mund të kalojë shifrën e 174 milionë dollarëve për sezon. Robert Lewandowksi pritet të përfitojë rreth 27 milionë paundë sezonin e ardhshëm, dhe sulmuesi polak është lojtari me kontratën më të majme në Camp Nou. Kjo e vendos atë në rrezik më të madh për t’u sakrifikuar nga klubi në verë.
Nunez nga ana tjetër është nga lojtarët më të paguar tek Liverpool. Megjithatë, krahasuar me Robert Lewandowksi, uruguaiani përfiton rreth 1 të katërtën e asaj që përfiton polaku tek Barcelona. Kjo e vendos klubin spanjoll në një pozitë të mirë financiare për të negociuar me Nunez dhe Liverpool. Momentalisht sulmuesi është i lumtur në Anfield, dhe nuk kërkon të lëvizë. Por mediat në Amerikën Latine kanë bërë të ditur se sulmuesin e intrigon ideja e të luajturit për gjigandët spanjollë.
Kujtojmë se Barcelona u përpoq të bënte të vetin Nunez para 3 vitesh, kur lojtari ishte pjesë e Almeria. Megjithatë, ishte Benfica ajo që ia doli të siguronte firmën e Darwin, dhe më pas Liverpool. Nunez është blerja më e shtrenjtë në historinë e “The Reds”, plot 85 milionë paundë. Lojtari ka një kontratë aktive me klubin deri në vitin 2028. Megjithatë, e ardhmja nuk është e sigurtë për asnjë në Anfield. Trajneri i ri i skuadrës, Arne Slot, do të marrë drejtimin e pankinës në fund të këtij sezoni dhe merkatoja e verës pritet të shoqërohet me afrime dhe largime në Anfield.
