Barcelona është tashmë në garë për të siguruar shërbimet e trajnerit të Sporting Lisbon, Ruben Amorim. Portugezi ka impresionuar këtë sezon nën drejtimin e Sporting, dhe është kthyer në shënjestrën e shumë klubeve europiane. Kjo është dhe arsyeja se përse drejtuesit e Barcelona janë hedhur tashmë në garë për të bindur teknikun që të vijë në krye të pankinës në Camp Nou.
Xavi Hernandez e ka bërë tashmë të ditur se do të largohet në fund të sezonit, dhe klubi spanjoll është në kërkim të një zëvëndësuesi afatgjatë. Trajneri i ardhshëm i balugranave do të ketë detyrën e vështirë të ringritjes së klubit, në nivelet më të larta pas një serie sezonesh zhgënjyese, sidomos në arenën europiane. Amorim shihet si zëvëndësuesi perfekt i Xavi, pasi portugezi ka dhënë provat se di të menaxhojë një klub që kërkon të ringrihet.
Megjithatë, Liverpool dhe Bayern Munich janë gjithashtu duke kërkuar një trajner të ri, dhe Amorim gjendet në listën e gjigandëve europianë. Fillimisht, si Liverpool ashtu dhe Bayern paten targetuar Xabi Alonso si objektivin e tyre kryesor për pankinën. Megjithatë, ky i fundit konfirmoi se do të qëndrojë të paktën dhe për 1 sezon tjetër tek Bayer Leverkusen. Kjo ka sjellë që vëmendja drejt Ruben Amorim të jetë akoma më e madhe.
Barcelona duhet të tregohet e shpejtë nëse kërkon të sigurojë firmën e teknikut të Sporting, pasi lista e klubeve që kërkojnë portugezin duket se është gjithnjë e në rritje. Momentalisht, trajneri ka një klauzolë të lartë për prishjen e kontratës me Sporting, që përllogaritet në rreth 13 milionë euro. Kjo është një ndër arsyet se përse ende nuk është arritur një akord mes Amorim dhe Barcelona, apo një klubi tjetër. Megjithatë, sipas të gjitha gjasave, Ruben do të largohet nga Sporting Lisbon në fund të sezonit.