Presidenti i Barcelonës, Joan Laporta, tha se nuk ka ndërmend të japë dorëheqjen, pas publikimit të lajmit mbi pagesat që klubi katalanas kishte bërë në emër të Jose Maria Enriquez Negreira. Ky i fundit para disa kohësh mbante titullin e zëvëndës-presidentit të federatës spanjolle të arbitrave. Publikimet kanë hedhur hije dyshimi mbi një aferë të mundshme korruptive që përfshin Jose dhe drejtuesit e Barcelonës, përfshirë dhe presidentin Laporta.
Ditën e hënë, presidenti i La Liga, Javier Tebas, u shpreh se Laporta duhet të jape dorëheqjen nëse nuk është në gjendje të shpjegojë shumat e parave që klubi i tij mendohet se i ka paguar Jose Maria para disa kohësh. Por Laporta duket se është i qetë, madje ka hedhur poshtë pretendimet e Tebas duke thënë se ky i fundit është “i fiksuar” me Barcelonën. Kur u pyet nga mediat nëse ishte i gatshëm të jepte dorëheqjen, ashtu si pretendoi dhe Tebas, Laporta komentoi:
“Kjo i takon anëtarëve të klubit për ta vendosur. Të gjithë ata që tentojnë të prishin historinë dhe imazhin e Barcelonës do të marrin një përgjigje të fortë… Disa persona na kishin paralajmëruar se Tebas po shtynte një fushatë kundër Barcelonës dhe kundër meje. Tani maska e tij ka rënë. Ai vazhdon obsesionin e tij me Barcelonën…qëllimi i tij është të kontrollojë klubin nga distanca, gjë që e ka bërë në vitet e fundit.”
Ndërkohë La Liga, në një deklaratë zyrtare u shpreh se shumica e klubeve kanë shprehur shqetësim të thellë lidhur me lajmet e publikuara, dhe i konsiderojnë ato mjaft serioze. Klubet e La Liga, por dhe ato të kategorisë së dytë spanjolle kërkojnë një qartësim sa më të shpejtë të situatës nga organet përkatëse.
Trajneri i Barcelonës, Xavi Hernandez, u shpreh se nuk kishte dijeni mbi aktivitetet e përmendura nga mediat në Spanjë. Tekniku komentoi:
“Unë kam dashur gjithmonë të fitoj, por në mënyrë të drejtë. Nëse do ta dija se po bënim me hile do të kisha ikur në shtëpi.”
