Pavarësisht se Newcastle ka bërë të qartë se Kieran Trippier nuk është në shitje, duket se Bayern Munich do të testojë përsëri drejtuesit e klubit anglez, me një ofertë të përmirësuar për shërbimet e mbrojtësit.
Pas bisedimeve ditën e shtunë dhe të diel, Newcastle la të kuptohet se nuk do të pranojë më oferta për kartonin e Trippier, por kjo situatë mund të ndryshojë në varësi të ofertës që vjen nga Bayern Munich. Sidomos duke marrë parasysh dhe vetë dëshirën e lojtarit, i cili sipas burimeve pranë tij, pëlqen idenë e të luajturit për gjigandët bavarezë. Nëse Trippier bëhet pjesë e ekipit të Thomas Tuchel, ai do të ribashkohet me Harry Kane dhe Eric Dier, ish shokët e tij të skuadrës tek Tottenham. Megjithatë, Trippier ka siguruar drejtuesit e klubit se nuk do të shtyjë me forcë një transferim tek Bayern.
E njejta situatë është zhvilluar dhe për Callum Wilson, i cili ka tërhequr interesin e Atletico Madrid. Megjithatë, spanjollët janë të interesuar vetëm për një marrëveshje në formë huazimi, dhe drejtuesit e Newcastle nuk janë të gatshëm për këtë lloj marrëveshjeje. Atletico ndërkohë nuk ka ndërmend të blejë në formë përfundimtare kartonin e sulmuesit, dhe Wilson pritet të qëndrojë te Newcastle.
Por, situata e Tripier është më delikate. Nga shitja e tij, Newcastle mund të përfitojë financat e duhura për të sjellë në klub një mesfushor të ri, që është dhe objektivi kryesor i trajnerit Howe. Drejtori ekzekutiv i Newcastle, Darren Eales, u shpreh para disa javësh se “çdo lojtar e ka një çmim”, duke lënë të kuptohet se askush nuk është i pazëvëndësueshëm. Kjo do të thotë se për të sjellë lojtarë të rinj në ekip, trajneri Howe mund të jetë i detyruar të ndërmarrë vendime të vështira.