Trajneri i Kroacisë, Zlatko Dalic, ka pranuar vështirësitë e përballjes me Brazilin, në çerek-finalet e Kupës së Botës. Tekniku kroat ka pranuar faktin se brazilianët janë ekipi favorit, por ka mbajtur lart moralin e të tijëve, duke thënë se Kroacia ka shanse reale për t’u kualifikuar. Në një intervistë për mediat, Dalic u shpreh:
“Brazili është favorit, le ta pranojmë. Brazili është kombëtarja më e fuqishme, dhe përfaqësuesja më e mirë në këtë kupë bote. Nga ajo që kam parë deri tani, kur shikon seleksionin e lojtarëve të tyre, kualitetin, aftësitë dhe vlerën e tyre, atëherë ata janë vërtet të frikshëm. Unë mendoj se kemi përpara nesh një provim mjaft të mirë, një task të vështirë përballë një ekipi që luan futboll të bukur me kaq shumë lojtarë kualitativë dhe të shpejtë.”
Dalic shtoi:
“Mendoj se nuk kemi pse frikësohemi nga asgjë. Duhet të zbresim në fushë me shumë besim, të shfrytëzojmë shanset tona dhe të shijojmë faktin se po përballemi me Brazilin, kjo është e gjitha… Ata janë një ekip fantastik, por kam besim se mund t’i sfidojmë… Ndeshja nuk është 50 me 50 por nuk jemi të disavantazhuar.”
Nëse Kroacia ia del të eleminojë Brazilin, do të përballet në finale me fituesin e sfidës Argjentinë – Hollandë.
Ndërkohë përsa i përket takimeve të tjera, Portugalia ia doli të kualifikohet në çerek-finale pas fitores së thellë 6-1 kundër Zvicrës. Portugezët nuk e vunë asnjëherë në diskutim çështjen e kualifikimit dhe ishin superiorë gjatë gjithë sfidës. Golat u shënuan nga Gonçalo Ramos (tripletë), Pepe, Guerreiro dhe Rafael Leão. Goli i ngushëlimit për Zvicrën u shënua nga Akanji në minutën e 58’.
Paralelisht, Maroku prodhoi një nga surprizat më të mëdha të këtij botërori, duke eleminuar Spanjën pas goditjes së penalltive. Koha e rregullt u mbyll me rezultatin 0-0, teksa të besuarit e Luis Enrique dështuan të prodhonin raste të pastra për shënim. Nga pika e bardhë gjithçka shkoi keq për Spanjën, që humbi 3 penalltitë e para, duke i dhuruar kështu Markout kualifikimin.
