Manchester City arriti të triumfojë në Etihad Stadium përballë Liverpool, në një ndeshje spektakolare të vlefshme për FA Cup. “Qytetarët” fituan 3-2, teksa Liverpool baraspeshoi dy herë avantazhin e ekipit të Pep, por në fund u dorëzua.
Goli i parë i sfidës u shënua nga bomberi Haaland, vetëm 10 minuta pas fillimit të lojës. Norvegjezi tregoi se pauza gjatë botërorit i ka shërbyer atij mjaft mirë për t’u rikthyer akoma më energjik dhe i rrezikshëm në fushën e blertë. Fabio Carvalho barazoi rezultatin për “The Reds” në minutën e 20’ të sfidës, dhe pjesa e parë e sfidës u mbyll në barazim.
Përgjatë të dytës, Liverpool pati raste të tjera për të kaluar kësaj rradhe në avantazh, por Darwin Nunez nuk u tregua i saktë përballë portës. Por City shfrytëzoi mjaft mirë mundësitë e krijuara duke shënuar golin e dytë me autor Mahrez, vetëm 2 minuta pas startit të pjesës së dytë. Sulmuesi shënoi një gol mjaft të bukur, duke u ndihmuar shumë dhe nga asisti fantastik i të talentuarit Rodri.
Megjithatë, kundërpërgjigja e Liverpool nuk do të vononte më shumë se 1 minutë. Mohamed Salah arriti të kapë të papërgatitur prapavijën kundërshtare, duke vendosur përsëri baraspeshën në fushë. Minutat e tjera u karakterizuan nga raste nga të dyja ekipet, por Manchester City ishte më i qartë në ndërtimin e aksioneve. Kjo i dhuroi “qytetarëve” dhe golin e fitores në minutën e 58’ me Ake. Kevin de Bruyne dhuroi një asist mjaft të bukur, që gjeti në mënyrë perfekte hollandezin. Takimi u mbyll me rezultatin 3-2, dhe ekipi i Pep Guardiolës avancon kështu në raundin e ardhshëm të FA Cup.
Liverpool nga ana tjetër duhet të gjejë formën e mirë sa më shpejt të jetë e mundur, teksa përveç këtij eleminimi, ekipi i Klopp përballet me një situatë të vështirë në Premier League. “The Reds” ndodhen 7 pikë larg Tottenham, që mban vendin e katërt në renditje.
