Shorteu i çerekfinaleve të Champions League ka vënë përballë njëri-tjetrit, dy gjigandë europianë. Kampionët në fuqi të Chelsea do të përballen me 13 herë fituesit e kompeticionit, Real Madrid. Kjo do të thotë se Carlo Ancelotti do të përballet me ish-skuadrën që ka drejtuar për 2 sezone, nga 2009 në 2011-ën.
Italiani është 1 nga 3 trajnerët e vetëm që ka fituar 3 herë trofeun prestigjoz të Champions League, 2 herë me kuqezinjtë e Milan dhe 1 herë me Real Madrid në vitin 2014. Pas aventurës me Everton në Angli, Ancelotti u rikthye përsëri në Santiago Bernabeu, dhe Real ka tashmë shansin të triumfojë përsëri në arenën europiane.
Chelsea dhe Real u ndeshën në gjysmëfinale sezonin e kaluar, dhe londinezët ia dolën të kualifikoheshin me rezultatin e përgjithshëm 3-1. Më pas të besuarit e trajnerit Tuchel mposhtën Manchester City në finale, për të ngritur lart trofeun. Fakt tjetër interesant është se sipas statistikave, londinezët nuk kanë humbur asnjë prej 5 përballjeve të fundit direkte me gjigandët spanjollë.
Ndërkohë përsa i përket sfidave të tjera, Atletico Madrid do të luajë përballë Manchester City. Ekipi i Diego Simeone ia doli nxjerrë jashtë gare Manchester United për të arritur në çerekfinale, dhe tani do të ketë shansin të eleminojë një tjetër ekip nga Manchesteri, vetëm se kësaj rradhe misioni duket shumë më i vështirë.
Liverpool ndërkohë do të luajë përballë portugezëve të Benfica, një kundërshtar relativisht më i lehtë se të tjerët. Ndërsa Villarreal do të përballet me gjigandët e Bayern Munich, të cilët janë mes favoritëve për t’i shkuar deri në fund trofeut.
Akti i parë i çerekfinaleve do të luhet në data 5 dhe 6 prill, ndërsa ndeshjet e kthimit në datë 12 dhe 13 prill. Finalja e këtij sezoni të Champions League do të zhvillohet në Stade de France në Paris.