Real Madrid ia doli të sigurojë një fitore të jashtëzakonshme në Bernabeu, me rezultatin 2-1 ndaj Bayern Munich, për të siguruar kështu finalen e Champions League. Ishte në fakt Bayern Munich që shënoi golin e parë me Alphonso Davies në minutën e 68’ të takimit. Ky i fundit goditi mjaft bukur me të djathtën, duke mposhtur Lunin, pas asistit të saktë të Harry Kane.
Pavarësisht se madrilenët patën vazhdimisht shance për shënim, goli do të vinte vetëm pas hyrjes së Joselu në fushën e blertë. Spanjolli hyri në fushë si zëvëndësues në minutën e 81’ të takimit dhe shënoi golin e barazimit në minutën e 88’, duke reaguar shpejt pas një gabimi të Manuel Neuer, i cili deri në atë moment kishte zhvilluar një ndeshje perfekte.
Vetëm 2 minuta më vonë, Joselu do të shënonte përsëri, duke dërguar në rrjetë topin pas pasimit të Rudiger brenda zonës. Fillimisht goli u anullua për pozicion jashtë loje, por pas inspektimit nga VAR goli mbeti i vlefshëm.
Në Bernabeu nuk munguan momentet kontroversiale, teksa në minutën e 13’ shtesë, De Light barazoi për Bayern Munich, por arbitri i pati rënë bilbilit për të sinjalizuar pozicion jashtë loje. Sipas disa planeve televizive, vendimi original për pozicion jashtë loje në fushë mund të ketë qënë i gabuar, dhe anullimi i golit u shoqërua me protesta nga trajneri Thomas Tuchel dhe disa lojtarë të Bayern.
Ndërkohë, të shumta ishin kritikat dhe ndaj trajnerit Thomas Tuchel, i cili hoqi nga fusha e blertë Harry Kane dhe Jamal Musiala në minutën e 85’ të sfidës, kur Bayern ishte ende në avantazh. Pas sezonit zhgënjyes në Bundesliga, Bayern është tashmë jashtë Champions League dhe ky do të jetë sezoni i parë i klubit pa trofe, që prej 12 vitesh. Tuchel do të largohet në fund të sezonit, duke i lënë Bayern mundësinë për një startuar një kapitull të ri.