Romelu Lukaku mund të përfundojë duke ngecur te Chelsea këtë sezon, teksa opsionet e lojtarit për një transferim diku tjetër sa vijnë dhe zvogëlohen. Momentalisht Lukaku po stërvitet me skuadrën U-21 të Chelsea, dhe duket se lojtari përfundimisht nuk e sheh veten si pjesë të bluve. Kjo është konfirmuar dhe nga fakti se belgu nuk ka patur ende asnjë kontakt me trajnerin Mauricio Pochettino.
Lukaku u bë pjesë e klubit londinez në vitin 2021 për shumën rekord prej 100 milionë paundësh. Tashmë Chelsea do të shesë përfundimisht kartonin e tij, dhe drejtuesit e klubit mund të pranojnë deri në 35 milionë paundë për shërbimet e tij. Kjo është dhe shuma që Juventus është i gatshëm të paguajë për sulmuesin. “Zonja e Vjetër” është e interesuar për shërbimet e Lukaku, por më parë duhet që të heqë dorë prej Dusan Vlahovic, për të siguruar fondet e duhura për lëvizjen.
Chelsea gjithashtu nuk ka pranuar një shkëmbim Lukaku – Vlahovic, për shkak të pagës së lartë të serbit si dhe historikut të tij të dëmtimeve. Një transferim i Lukaku drejt Arabisë Saudite gjithashtu nuk duket i mundur në këtë pikë, teksa Al-Hilal u tërhoq nga gara për Lukaku, pas afrimit të bomberit serb, Aleksandar Mitrovic.
Muajin e kaluar, negociatat mes Inter dhe Lukaku, për të firmosur një marrëveshje permanente me klubin u ndërprenë, pasi drejtuesit e Inter mësuan se belgu ishte gjithashtu në bisedime me Juventus. Zikaltërit u ndjenë të tradhëtuar nga Lukaku, i cili sipas tyre i kishte dhënë fjalën se në përfundim të periudhës së huazimit, do të përpiqej për të firmosur një kontratë permanente me klubin.
Në këto momente, e vetmja shpresë e Chelsea për të larguar Lukaku nga Stamford Bridge, është Juventus. Nëse italianët do të gjejnë fondet e duhura, brenda afatit të mbylljes së merkatos, atëherë sipas të gjitha gjasave mes Chelsea dhe Juventus mund të arrihet një marrëveshje.