Megjithëse Romelu Lukaku është përfolur së fundmi për një rikthim në Itali tek Inter, sulmuesi duket se është i vendosur që të luftojë fort dhe të fitojë trofe në Londër me Chelsea. Sulmuesi u la jashtë ndeshjes kundër Lille, të vlefshme për Champions League, në të cilën të besuarit e Tuchel fituan pastër me rezultatin 2-0. Lënia në stol e Lukakut ka ngritur dhe një herë dyshime të forta mbi të ardhmen e tij.
Raportime në Itali bëjnë me dije se lojtari është gati të pranojë një ulje page, për t’u rikthyer dhe një herë tek Inter. Vet Lukau ka pranuar se nuk po kalon momentin e tij më të mirë, duke iu referuar performancave të fundit, por kjo nuk do të thotë se sulmuesi është gati të heqë dorë kaq shpejt nga aventura e tij në Angli.
Trajneri Thomas Tuchel insistoi se vendimi për të lënë në stol Lukaku në ndeshjen me Lille, ishte për t’i hequr futbollistit presionin e mediave, pas paraqitjes së fundit ndaj Crystal Palace. Në përballjen me këta të fundit, Lukaku e preku topin vetëm 7 herë gjatë gjithë takimit, një rekord tepër negativ.
Ende nuk është e garantuar nëse futbollisti do të jetë pjesë e formacionit titullar të Chelsea në ndeshjen ndaj Liverpool. Kjo pasi Kai Havertz zhvilloi një paraqitje mjaft të mirë ndaj Lille, duke arritur të gjejë rrugën e rrjetës. Por ylli i kombëtares belge nuk ka ndërmend të dorëzohet lehtë. Sulmuesi shënoi gol në të dyja ndeshjet e Botërorit të Klubeve në Abu Dhabi dhe paraqitja e dobët ndaj Crystal Palace u duk qartë se ishte thjesht një ditë e keqe për lojtarin.
Megjithatë, shumë gjëra do të varen nga hapësirat që trajneri Tuchel do t’i ofrojë Lukakut në ndeshjet e ardhshme. Në qoftë se situata aktuale vazhdon, duket e vështirë që sulmuesi të pranojë një rol sekondar tek blutë e Londrës.