Thomas Tuchel ka bllokuar tratativat e Timo Werner, për t’u larguar nga Chelsea këtë verë. Duket se trajneri gjerman ende e sheh sulmuesin si pjesë të planeve të tij, pavarësisht paraqitjeve të lojtarit. Werner ka dështuar të ketë një impakt të madh në Stamford Bridge, teksa ka shënuar vetëm 23 gola në 89 paraqitje me klubin.
Sipas prestigjozes Kicker, Tuchel ende beson tek aftësitë e gjermanit, por ky i fundit nuk është i lumtur me hapësirat që i janë lënë në skuadër. Lojtari startoi si titullar në vetëm 15 takime gjatë sezonit që lamë pas në Premier League. Muajin e kaluar, Werner sugjeroi se ishte i hapur ndaj idesë për t’u larguar nga Chelsea, duke qënë se kërkon më shumë minuta loje. Ai u shpreh:
“Mund të jem i lumtur kudo…Është e qartë se dua të luaj më shumë dhe duhet të luaj më shumë, që të jem në një formë të mirë për Kupën e Botës dhe të kem shansin të luaj në këtë kompeticion. Nuk ndryshon asgjë nëse Botërori organizohet në dimër apo në verë. Mendoj se nëse luaj gjatë gjysmës ose gjatë gjithë sezonit, duhet të luaj (Në Botëror). Asgjë nuk ndryshon në mendjen time.”
Por trajneri Tuchel komentoi ndryshe situatën e sulmuesit tek blutë e Londrës. I pyetur për largimin e mundshëm të Werner, tekniku tha:
“Nuk e di, Timo nuk më ka thënë gjë për këtë. Në këtë moment mendoj se ai dëshiron të krijojë rrugën e tij tek Chelsea. Ai ende ka diçka për të vërtetuar.”
RB Leipzig në Gjermani ka shprehur interes për të ri-blerë kartonin e Werner gjatë kësaj merkatoje. Megjithatë, burime pranë lojtarit bëjnë me dije se sulmuesi nuk i pëlqen ideja e rikthimit tek klubi i tij i vjetër, dhe do të preferonte një lëvizje diku tjetër.