Pas shkarkimit të Thomas Tuchel, drejtuesit e Chelsea nuk kanë vonuar për të zyrtarizuar trajnerin e ri të bluve. Ashtu si dhe ishte përfolur, ish-tekniku i Brighton, Graham Potter, do të drejtojë tashmë londinezët për 5 vitet e ardhshme. 47 vjeçari u shpreh mjaft i lumtur dhe krenar për detyrën e re.
Ndeshja e parë për Potter do të jetë ajo përballë Fulham në transfertë, një sfidë delikate për Chelsea. Anglezi do të sjellë në Stamford Bridge dhe stafin e tij ndihmës, mes të cilëve asistentin Billy Reid, trajnerët Bjorn Hamberg dhe Bruno, trajnerin e portierëve Ben Roberts, si dhe drejtorin e rekrutimeve, Kyle Macaulay.
Presidenti i Chelsea, Todd Boehly, komentoi afrimin e Potter:
“Jemi të emocionuar për të mirëpritur Graham tek Chelsea. Ai është një trajner i sporvuar dhe një inovator në Premier League, që i përshtatet vizionit tonë për klubin. Jo vetëm që ai është ekstremisht i talentuar në fushë, por ka aftësitë dhe kapacitetin e duhur përtej fushës së blertë, të cilat do ta bëjnë Chelsea një klub më të suksesshëm. Potter ka patur një impakt madhor në klubet ku ka punuar më parë dhe mezi presim impaktin e tij pozitiv tek Chelsea.”
Tekniku anglez udhëhoqi Brighton në vendin e 9 sezonin e kaluar në Premier League. Ky ishte rezultati më i mirë i regjistruar në historinë e klubit. Përveç Brighton, Potter gjithashtu ka trajnuar Ostersunds FK dhe Swansea City. Në lidhje me aventurën e tij të re, trajneri u shfaq mjaft pozitiv. Ai deklaroi:
“Jam shumë i emocionuar të bashkëpunoj me pronarët e rinj të Chelsea, dhe të njihem e të punoj me një grup fantastik lojtarësh, për të krijuar një skuadër dhe një kulturë të tillë që fansat të jenë krenarë me ne.”
Potter gjithashtu falenderoi Brighton, për 3 vitet fantastike nën drejtimin e ish-klubit të tij.