David de Gea ka refuzuar një ofertë stratosferike financiare për t’iu bashkuar arabëve të Al-Nassr. Sipas mediave angleze, ish-portierit të Manchester United i është ofruar një page javore prej gati 500 mijë paundësh, për t’u bashkuar me ish-shokun e tij të skuadrës tek “Djajtë e Kuq”, Cristiano Ronaldo.
Momentalisht De Gea është pa një klub pas largimit nga Old Trafford, por duket se spanjolli ka zgjedhur të mos nxitohet dhe të mendojë më mirë destinacionin e rradhës. Burimet pranë lojtarit bëjnë me dije se bashkëshortja e tij, Edurne, nuk e pëlqen idenë e zhvendosjes në Arabinë Saudite, dhe kjo duket se është mjaftueshëm për të bindur De Gea.
Por cili do të jetë klubi i ardhshëm në karrierën e spanjollit? Mediat bëjnë me dije se Inter Miami në Amerikë ka shprehur interes për kartonin e De Gea, dhe spanjolli gjithashtu po e konsideron këtë mundësi. Tek Inter Miami luan jo vetëm Lionel Messi, por dhe ish-shokët e De Gea të kombëtares spanjolle, Jordi Alba dhe Sergio Busquets.
Ndërkohë, ideja e një rikthimi afatshkurtër tek Manchester United është ende duke qarkulluar, por gjasat që kjo të ndodhë janë të vogla. De Gea është parë ditët e fundit në Manchester, ku u takua dhe me ish-shokët e tij të ekipit, Sergio Reguilon dhe Bruno Fernandes. Megjithatë, burime pranë lojtarit kanë bërë të ditur se spanjolli e konsideron të mbyllur kapitullin e tij në Old Trafford.
Portieri u largua nga ekipi për shkak të vështirësive të tij për të ndihmuar ekipin në ndërtimin e aksioneve nga porta. Trajneri i United, Erik ten Hag, ishte në kërkim të një portieri që mund të luante më mirë me këmbë, dhe kjo ishte dhe arsyeja e ardhjes së Andre Onana në Old Trafford, nga Inter Milan.
