West Ham duket se ka pranuar ofertën e Arsenal, prej 105 milionë paundësh për kartonin e Declan Rice. Bisedimet ende po vazhdojnë mes klubeve për të diskutuar strukturën e marrëveshjes, por tashmë është e qartë se Rice së shpejti do të jetë lojtar i Arsenal.
Zhvillimi i fundit erdhi pas largimit të Manchester City nga gara për Rice. “Qytetarët” bënë një ofertë zyrtare prej 90 milionë paundësh, e cila u refuzua nga West Ham. Pas kësaj, ekipi i Pep Guardiolës hoqi dorë nga ndjekja e lojtarit, duke i hapur kështu rrugën Arsenal.
Kujtojmë se Rice ka qënë pjesë e akademisë së West Ham që prej vitit 2014. Këtë sezon, mesfushori anglez ndihmoi ekipin e tij të ngrejë lart trofeun e Europa Conference League. Ky ishte trofeu i parë madhor për West Ham, prej më shumë se 43 vitesh. Kontrata e Rice me West Ham skadon vitin e ardhshëm, dhe drejtuesit e klubit e dinin se duhej të vepronin shpejt, në mënyrë që anglezi të mos largohej me kosto zero.
Ndërkohë, pavarësisht shifrës stratosferike që Arsenal pritet të paguajë për Rice, transferimi më i shtrenjtë në historinë e Premier League mbetet ai i Enzo Fernandez tek Chelsea. Blutë e Londrës paguan plot 107 milionë paundë për transferimin e tij nga Benfica në merkaton e janarit.
Arsenal nga ana tjetër zyrtarizoi ditën e sotme dhe afrimin e Kai Havertz nga Chelsea. Lojtari ka firmosur një kontratë të vlefshme deri në vitin 2028 me klubin. Havertz luajti për 3 sezone në Stamford Bridge, duke arritur të fitojë dhe Champions League-ën. Megjithatë, impakti i tij tek Chelsea nuk ishte ai i prituri, teksa shumë tifozë të klubit prisnin më shumë prej lojtarit.
Mbetet të shohim nëse Mikel Arteta do të dijë të nxjerrë më të mirën prej Havertz në fushën e blertë.