Klubi anglez i Newcastle dëshiron të afrojë portierin shqiptar të Lazio, Thomas Strakosha, në muajin janar. Të ashtuquajturit “The Toon” dërguan agjentë të klubit, për të parë live në fushën e blertë, performancën e Strakoshës në Europa League javën e kaluar.
Portieri është aktivizuar në 16 paraqitje me kombëtaren shqiptare, duke u etiketuar si një nga pikat më të forta të kuqezinjëve. Por te Lazio, Strakosha duket se e ka humbur vendin e titullarit në ekip. Trajneri i italianëve, Maurizio Sarri, preferon veteranin Pepe Reina në portë. Ky i fundit është aktivizuar gati në çdo takim në kampionat. Ndërkohë Strakoshës i është lënë hapësirë në Europa League, por 26 vjeçari nuk është i kënaqur me minutat që i janë dhënë në dispozicion.
Newcastle është në kërkim të një portieri të kalibrit të lartë botëror, dhe interesi i tyre për Strakoshën është një vlerësim i shtuar për shqiptarin. Ky i fundit kërkon një aventurë të re, dhe Premier League-a angleze është një nga destinacionet më të lakmuara për çdo futbollist.
Mes alternativave të tjera për të mbrojtur portën e Newcastle, është dhe Marc-Andre ter Stegen i Barcelonës. Fatin e kësaj lëvizjeje pritet ta vendosë trajneri i ri i katalanasve, Xavi. Portieri gjerman është një nga asetet më të vlefshme të spanjollëve, por Newcastle mund të ofrojë më shumë se 47 milionë paundë për shërbimet e lojtarit. Kjo shumë është mjaft tunduese për Barcelonën, e cila është në një pozitë financiare mjaft të vështirë.
Por, nëse transferimi i Ter Stegen nuk bëhet realitet, dyert janë të hapura për Strakoshën në St. James’ Park.
Ndërkohë kandidati potencial për postin e trajnerit te Newcastle, Eddie Howe, u takua me mikun e tij të vjetër Michael Edwards. Ky i fundit pritet të mbajë postin e drejtorit sportive tek Newcastle, në rast se Howe vendoset në krye të pankinës.