Sipas raportimeve më të fundit të mediave gjermane, Robert Lewandowski ka pranuar një marrëveshje paraprake për një transferim tek Barcelona. Bomberi polak i ka bërë me dije drejtorit të klubit Oliver Kahn se nuk do të firmosë një kontratë të re me ekipin bavarez. Kujtojmë se sulmuesi ka vetëm 1 vit tjetër në kontratën e tij aktuale me Bayern, pra marrëveshja skadon në verën e 2023-shit.
Mediat gjermane kanë zbuluar se drejtuesit e Bayern kanë qënë vazhdimisht skeptikë për t’i ofruar Lewandowskit një rinovim kontrate, dhe kjo gjë ka mërzitur disi lojtarin dhe përfaqësuesin e tij. Kjo mund të ketë shtyrë akoma më shumë sulmuesin drejt rënies dakord me Barcelonën për një transferim në Camp Nou. Nëse lëvizja zyrtarizohet, Lewandowski do të jetë lojtari i parë polak që vesh fanellën e Barcelonës.
Operacioni përsëri mbetet i vështirë për spanjollët, duke marrë parasysh vështirësitë financiare. Megjithatë, drejtuesit e klubit katalanas e kanë në mendje një strategji. Sergino Dest është një nga lojtarët e Barcelonës, që Bayern Munich e ka identifikuar prej kohësh si objektiv të vetin. Mbrojtësi mund të përfshihet në një marrëveshje të mundshme mes 2 klubeve dhe kjo do të ulte në mënyrë të ndjeshme koston e kartonit të Lewandowski.
Bomberi i bavarezëve po luan sezonin e tij të tetë me gjigandët e Bayern, dhe ka fituar statusin si një nga sulmuesit më të mirë në botë në këto vite. Që prej afrimit nga Borussia Dortmund në vitin 2014, polaku ka arritur të shënojë plot 340 gola në 369 paraqitje me Bayern Munich, një shifër e jashtëzakonshme.
Muajin e kaluar sulmuesi u shpreh për Sky Sports se ishte i hapur për një aventurë të re në karrierën e tij. Mesa duket, destinacioni i ardhshëm i Lewandowskit do të jetë Barcelona e trajnerit Xavi.
