Talenti i Borussia Dortmund, Erling Haaland, me shumë gjasa do të jetë një nga protagonistët e mëdhenj të merkatos verore. Sulmuesi norvegjez ka vendosur të largohet nga klubi gjerman, pavarësisht përpjekjeve të forta të Dortmund për ta mbajtur atë në ekip. Kjo pasi Haaland dëshiron që të nisë një aventurë të re, në një klub më ambicioz.
Ofertat nuk kanë munguar për sulmuesin, i cili është target i klubeve më të mëdha europiane. Agjenti i tij, Mino Raiola është duke negociuar me disa klube, por ky i fundit, preferon Barcelonën si destinacionin e ardhshëm për futbollistin. Kjo për shkak të raportit të mirë që agjenti ka me presidentin e klubit, Joan Laporta.
Megjithatë, dëshira e Haaland nuk duket se përputhet me planet e agjentit të tij. Sulmuesi parapëlqen një lëvizje drejt Premier League, ose një transferim tek galaktikët e Real Madrid. Këta të fundit e kanë bërë publik tashmë interesimin për yllin e Dortmund. Presidenti Florentino Pérez është i gatshëm të paguajë për kartonin e futbollistit dhe pagën e tij. Burime të caktuara bëjnë me dije se Pérez mund të largojë pa frikë dhe Benzema nga klubi, për t’i dhënë më shumë hapësira Haaland.
Kjo ofertë mund të bëhet akoma më tunduese për norvegjezin duke marrë parasysh se ai mund të luajë përkrah Kylian Mbappe. Kontrata e këtij të fundit me PSG skadon në verën e ardhshme. Kjo do të thotë se në qershor, Mbappe mund t’i bashkohet Real Madrid me kosto zero.
Por cili është plani i Mino Raiola për të bindur Haaland që t’i bashkohet Barcelonës dhe jo Real Madrid-it apo një klubi tjetër? Agjenti i ka premtuar lojtarit se te Barca ai do të jetë superstari kryesor dhe pasuesi i Leo Messit. Ndërsa tek Real Madrid, ai do të jetë i detyruar të ndajë hapësirat dhe vëmendjen me yje të tjerë, potencialisht dhe Kylian Mbappe.
Mbetet të shohim se sa i madh do të jetë ndikimi i super-agjentit spanjoll tek Haaland.