Trajneri i Tottenham, Ange Postecoglou, është shprehur se tek ekipi i tij duhet të ketë ndryshime. Klubi londinez ndodhet momentalisht në vendin e pestë në renditjen e përgjithshme të Premier League, por të besuarit e teknikut australian janë mposhtur në 3 ndeshjet e fundit, përfshirë këtu një disfatë 2-0 ndaj Chelsea. Duke komentuar rezultatet e fundit të skuadrës së tij, trajneri Ange Postecoglou theksoi nevojën për ndryshime në ekip:
“Duhet të bëj ndryshime në këtë skuadër. Duhet pasi duhet të ndërtoj një ekip që mund të luajë futbollin tonë. Që kjo të ndodhë, duhet të ketë largime. Na duhet ndryshim, ndryshimi duhet të ndodhë. Nuk mund të presësh që të ndryshosh drejtimin në mënyrë të menjëhershme…dhe të njejtët lojtarë të ndjekin atë drejtim. Nuk ka për të ndodhur. Kemi qënë aktivë në 2 merkato dhe kemi patur disa lojtarë që janë zhvilluar, por kur them se kemi ende rrugë të gjatë përpara, për këtë e kam fjalën.”
Ange Postecoglou sqaroi më tej mendimin e tij:
“Për të luajtur në një mënyrë të caktuar, duhet të stërvitesh në një mënyrë të caktuar, dhe duhet të kemi një mentalitet të caktuar dhe kjo nuk është për të gjithë. Kjo është e njejtë dhe për Liverpool apo Arsenal, nëse sheh fillimin e rrugëtimit të tyre, në momentin që ata fitojnë një trofe apo janë të suksesshëm, ekipi i tyre nuk njihet nga ai i pari.”
Gjithsesi, pavarësisht nevojës për ndryshim të theksuar nga Postecoglou, Tottenham ka afruar jo pak lojtarë të rinj që prej ardhjes së tij në krye të pankinës. Mes tyre mund të përmendim James Maddison, Brennan Johnson, Micky van de Ven, dhe portierin Guglielmo Vicario. Ndërkohë mes lojtarëve që u larguan nga klubi londinez ishin Eric Dier, Davinson Sanchez dhe portieri legjendar Hugo Lloris.