Kompanitë e basteve e kuotojnë Real Madrid si ekipin e pestë në rradhë për të fituar Champions League këtë vit. Gjithsesi, ky fakt nuk ka habitur aspak trajnerin Carlo Ancelotti, i cili ka thënë se nuk është i surprizuar nga koeficientët e basteve. Bayern Munich, Paris St-Germain, Manchester City dhe Liverpool janë të gjitha ekipe që konsiderohen më favorite se madrilenët këtë sezon, në kompeticionin prestigjoz.
Ancelotti ndërkohë i kujtoi opinioit sportiv se Real Madrid nuk ishte favorit as sezonin e kaluar, por ia doli të ngrejë lart trofeun. Italiani komentoi:
“Nëse do të thotë diçka, mendoj se është shenjë e mirë. Ne nuk na bezdis të konsiderohemi si ekipi jo-favorit, në fakt nëse ka ndodhur diçka me ekipin është që jemi përmirësuar.”
Këtë merkato vere, Real Madrid afroi dy lojtarë mjaft të talentuar në skuadër, Aurelien Tchouameni nga Monaco, dhe qendër-mbrojtësin gjerman Antonio Rudiger. Ndërkohë veterani Marcelo u largua nga ekipi pas një aventure të jashtëzakonshme, ku fitoi gjithçka me galaktikët. Këta të fundit kanë fituar 4 sfidat e para të këtij sezoni të ri në La Liga dhe kryesojnë kampionatin.
Trajneri Ancelotti komentoi gjithashtu mbi grupin F, ku Real do të zhvillojë ndeshje ndaj Celtic, RB Leipzig dhe Shakhtar Donetsk. Italiani vlerësoi kualitetin e kundërshtarëve duke thënë se grupi nuk mund të konsiderohet kurrsesi i lehtë:
“Nuk është aspak një grup i lehtë. Celtic si fillim, janë një ekip i fortë, dhe gjithashtu duhet të respektojmë RB Leipzig dhe Shakhtar Donetsk. Në grup mund të ketë surpriza. Mendoni për atë që ndodhi vitin e kaluar përballë Shakhtar. Gjithçka mund të ndodhë.”
Gjithsesi, madrilenët u shfaqën mjaft konfidentë në ndeshjen e parë të grupit, teksa fituan 3-0 përballë Celtic në një transfertë delikate.
