Mesfushori Declan Rice ka thënë se do të gjykohet mbi trofetë që fiton me Arsenal, dhe jo me paraqitjet e tij individuale. Ish-kapiteni i West Ham i ka bërë të qarta objektivat e tij me klubin londinez, duke theksuar rëndësinë e fitimit të trofeve. Në një intervistë të fundit, Rice u pyet mbi objektivin dhe arsyen se përse iu bashkua Arsenal. Lojtari u përgjigj:
“Për të fituar trofe. Kjo është arsyeja se përse lojtarët që ne kemi janë këtu. Ke vetëm një karrierë dhe në fund do që ajo të vlerësohet nga sa trofe ke fituar. E di se kjo skuadër është e uritur për të fituar trofe. Jemi të rinj, të uritur dhe plot me energji. Nga sezoni i kaluar, ata kanë mësuar shumë, dhe këtë vit, me gjithë konkurrentët me të cilët do të përballemi ka vetëm një qëllim. Ai është të fitojmë, jo thjesht të marrim pjesë.”
Rice gjithashtu u shpreh dhe një herë tjetër i bindur se zgjedhja e Arsenal ishte vendimi i duhur për të:
“E kisha një ndjesi të mirë që në fillim. Kam vetëm 10 ditë që jam këtu dhe ndiej sikur zgjedhja ime ia ka vlejtur. Individualisht ka shumë gjëra që dua të shtoj në lojën time. Dua të përmirësohem, të luaj më mirë dhe mësoj gjëra të ndryshme. Mendoj se Mikel mund të nxjerrë më të mirën time.”
Rice gjithashtu vlerësoi faktin se do të luajë në Champions League:
“Do të jetë gjëja më e mirë. Në futboll është maja. Jo shumë lojtarë e kanë mundësinë të luajnë në Champions League. Të kem këtë shans për të veshur fanellën e Arsenal dhe për të dëgjuar atë himn do të jetë speciale…Mendoj se ky klub e meriton të jetë në Champions League dhe të ketë mbrëmjet e mëdha, mezi pres ta përjetoj.”