Trajneri i Newcastle, Eddie Howe, është shprehur se për Sandro Tonali, sfidat më të vështira do të jenë ato që do të vijnë në ditët në vijim. Howe iu referua një hetimi që është hapur ndaj lojtarit, për akuzat e vënies së basteve në mënyrë të jashtëligjshme. Pavarësisht këtij hetimi, dhe situatës së vështirë, Tonali ishte pjesë e skuadrës në fitoren 4-0 ndaj Crystal Palace në fundjavë.
Megjithatë, italiani mund të dënohet për një kohë të gjatë jashtë fushave të blerta, dhe trajneri Howe i ka paraprirë në një farë mënyre kësaj mundësie:
“Mendoj se pjesa më e vështirë është ajo që do të vijë, pavarësisht se çfarë do të ndodhë. Situata ka marrë menjëherë shumë vëmendje dhe njerëzit kanë filluar të flasin për të. Ai (Tonali) mori suportin e tifozëve sot, por kjo është e vështirë për t’u ruajtur për një kohë të gjatë. Kushedi se çfarë mund të ndodhë më vonë…?”
Trajneri i Newcastle United shtoi:
“Mendoj se është mirë për të që ta dijë se ka suportin jo vetëm të drejtuesëve të lartë të klubit dhe trajnerit, por dhe suportin e fansave, dhe ata janë njerëzit më të rëndësishëm.”
Tonali ka marrë dhe mbështetjen e shokëve të tij të skuadrës, në këtë moment të vështirë. Jacob Murphy ka komentuar mbi situatën:
“…Kjo tregon se klubi jonë është një familje e madhe. E kemi suportuar atë (Tonali) përgjatë gjithë javës, dhe fansat gjithashtu shprehën shumë dashuri ndaj tij.”
Ndërkohë, Anthony Gordon ka lëvduar Tonali për performancën e tij në fushën e blertë, edhe në këtë moment të vështirë. Hetimi ndaj italianit pritet të vazhdojë dhe vendimi përfundimtar ende nuk dihet se kur mund të bëhet i ditur. Megjithatë, Newcastle dhe trajneri Howe duhet të përgatiten për skenarin më të keq, duke marrë parasysh dhe nevojën për një zëvëndësues të përkohshëm të Tonali.
