Trajneri i Manchester United, Erik ten Hag, ka thënë se reagimi i mediave ndaj ndeshjes së ekipit të tij me Coventry në FA Cup ishte i turpshëm. Pavarësisht kualifikimit në finale, United mori shumë kritika pas përballjes me Coventry. Kjo pasi “Djajtë e Kuq” shpërdoruan një avantazh 3-0, dhe u kualifikuan vetëm pas goditjes së penalltive, përballë kundërshtarëve nga Championship.
Në një intervistë për shtyp, në prag të sfidës ndaj Sheffield United në Premier League, Ten Hag u shpreh mjaft kritik ndaj reagimit të mediave pas përballjes me Coventry. I pyetur nëse e kuptonte reagimin negative hollandezi u shpreh:
“Jo. Absolutisht jo. Reagimi nga ju (media) ishte i turpshëm. Dy finale të FA Cup në 2 vite, është fantastike. Për mua si trajner, 4 finale në 4 vite. Komentet janë të turpshme… Futbolli në fund të ditës bazohet tek rezultatet. Ia dolëm të kualifikohemi në finale dhe e merituam. Humbëm kontrollin 20 minutat e fundit dhe ishim me fat gjatë penalltive, por ia dolëm të shkojmë në finale. Kjo është një arritje e madhe.”
Ndërkohë tek United, braziliani Antony gjithashtu u kritikua për festimin e tij përballë lojtarëve të Coventry, në përfundim të goditjes së penalltive. Ten Hag gjithashtu sqaroi për mediat këtë moment:
“Ai (Antony) u provokua dhe nuk duhet të reagojë kështu. Ju nuk keni parë provokimin, vetëm reagimin, por gjithsesi ai nuk duhet ta kishte bërë… Duhet të vlerësojmë performancën e Coventry, ata ia dolën të riktheheshin në lojë pas 70 minutave ku ne dominuam ndeshjen. Takimi duhej të ishte mbyllur nga ana jonë, por përmbysja e tyre ishte mjaft e mirë.”
Manchester United ndodhet momentalisht në vendin e shtatë në renditjen e përgjithshme të Premier League, dhe fitorja ndaj Sheffield United është i vetmi rezultat i pranueshëm në shtëpi.