Bomberi i Manchester City, Erling Haaland, ka thënë se do të bëjë gjithçka të jetë e mundur për të fituar tripletën me Manchester City. Të besuarit e Pep Guardiolës kanë fituar tashmë Premier League, dhe gjithashtu do të luajnë në finalen e FA Cup dhe Champions League. Manchester United i fitoi të tre trofetë në vitin 1999, dhe është i vetmi klub në Angli që ka arritur këtë objektiv. Haaland ndërkohë ka komentuar:
“Do të ishte e pabesueshme të realizonim këtë histori. Kjo është arsyeja se përse më sollën këtu, për të arritur këtë, nuk duhet ta fshehim. Do të ishte e jashtëzakonshme. Do të bëj gjithçka që mundem për ta realizuar. Kjo është ëndrra ime më e madhe, le të shpresojmë se ëndrrat realizohen.”
Gjithsesi, Haaland gjithashtu analizoi vështirësitë e sigurimit të tripletës. Bomberi norvegjez shtoi:
“Por dihet se nuk është e lehtë, janë dy finale përballë dy ekipeve shumë të mira, që do të bëjnë çdo gjë për ta shkatërruar atë (ëndrrën tonë). Do të jenë të motivuar, do të jenë gati dhe ne duhet të bëjmë lojën tonë më të mirë, sepse nëse jemi në formën tonë më të mirë, kemi një shans të mirë për të arritur atë (tripletën).”
Mes të tjerash, Haaland tha:
“Kemi ndjekur Arsenal gjatë gjithë sezonit, dhe kur fituam Premier League ishte një çlirim i madh. Tani kemi dhe dy finale të mbetura, dhe e vetmja gjë që duhet të bëjmë është të fokusohemi tek to përpara pushimeve…Nuk do të jetë një ndeshje e lehtë (ndaj United). Nuk duhet të mendohemi shumë, duhet të fokusohemi tek vetja dhe të dalim tek loja jonë. Në fund do të shohim. Kjo është një ndeshje futbolli 90-minutëshe dhe ata që e luajnë më mirë në të tilla lojëra fitojnë.”
