Bomberi norvegjez i Manchester City, Erling Haaland, ka thënë se mungesa në botërorin e Katarit, e ka motivuar të shënojë më shumë gola në Premier League. Sulmuesi ka shënuar deri më tani 20 gola në 14 ndeshje me “qytetarët” dhe iu rikthye aksionit në kampionatin anglez me një dopietë ndaj Leeds në Elland Road.
Haaland komentoi për Amazon Prime:
“Kam ndenjur në shtëpi, disi i mërzitur që nuk kam luajtur në Kupën e Botës. Të shohësh të tjerët teksa shënojnë dhe fitojnë ndeshje në botëror më motivon, por dhe më irriton disi. Jam më i uritur dhe më gati se kurrë.”
Pas ndeshjes me Leeds, Haaland u shpreh i lumtur jo vetëm për rezultatin, por dhe për rëndësinë emocionale të kësaj sfide. Norvegjezi ka qënë një tifoz i Leeds në fëmijërinë e tij, duke qënë se babai i tij, Alfie Haaland, ka luajtur me Leeds, por dhe me Manchester City. Sulmuesi deklaroi:
“Jam i lumtur…është një moment vërtet special në karrierën time. As në fantazitë e mia më të çmendura nuk do ta kisha menduar se do të luaja në Elland Road dhe do të shënoja për Manchester City kundër Leeds.”
Trajneri Guardiola ndërkohë ka thënë se Haaland ende nuk është në 100% e tij, duke lënë të kuptohet se bomberit i është dashur kohë të marrë veten nga dëmtimi i marrë në sfidën ndaj Borussia Dortmund në Champions League, në ndeshjen e luajtur në tetor. Spanjolli tha për mediat:
“Ai nuk është ende në më të mirën e tij siç ishte në fillim të sezonit. Dëmtimi që mori ndaj Dortmund ka ndikuar për një kohë të gjatë. Të lëvizë trupin e tij të madh nuk është e lehtë për të, por sa më shumë minuta luan, aq më mirë do të bëhet.”
