Trajneri i Chelsea, Frank Lampard, beson se ekipi i tij mund të përmbysë humbjen 2-0 përballë Real Madrid, në sfidën e parë të çerek-finaleve në Champions League. Blutë e Londrës u mposhtën nga spanjollët në Bernabeu dhe kualifikimi në gjysmëfinale duket tashmë një mision tejet i vështirë. Megjithatë, Lampard ka ende besim tek ekipi i tij. Tekniku anglez u shpreh për mediat pas humbjes:
“Në Stamford Bridge mund të ndodhin gjëra speciale. Duhet të vazhdojmë të kemi besim.”
Lampard gjithashtu u pyet nga gazetarët për vështirësitë që Chelsea po has përpara portës. Blutë kanë dështuar të gjejnë rrugën e rrjetës në 4 ndeshjet e fundit në të gjitha kompeticionet dhe kjo nuk ka ndodhur që prej vitit 1993. Tekniku anglez komentoi:
“Ndonjëherë ka të bëjë me vetëbesimin, mund të jetë individual ose për gjithë ekipin. Nëse vazhdojmë të punojmë mund të ndryshojmë. Merrni rastin për gol të Mason Mount në fund të takimit, nëse do të përfundonte në rrjetë loja do të kishte tjetër formë… Lojtarët nuk e dinë se sa të zotë janë. Ata zotërojnë shumë talent. Javën tjetër do të jetë një betejë e madhe. Ka disa detaje që lidhen me mentalitetin tonë ku duhet të jemi më pozitivë.”
Mario Melchiot, një ish-lojtar i Chelsea që ka fituar FA Cup në vitin 200 me londinezët, komentoi formën e ekipit gjatë këtij sezoni, duke nënvizuar nevojën e një sulmuesi cilësor në skuadër. Melchiot u shpreh:
“Chelsea ka talent në organikën e vet, ata e kanë aftësinë. U duhet një sulmues, por ata që po luajnë në këtë moment, gjithashtu duhet të shprehin më shumë dëshirë për të gjetur golin.”
Ish-sulmuesi i njohur i Premier League, Chris Sutton, është i të njejtit mendim, teksa ka kërkuar më shumë angazhim dhe përfshirje aktive në lojë, nga vija ofensive e Chelsea.
