Trajneri i përfaqësueses angleze, Gareth Southgate, ka deklaruar për mediat se është momenti që ekipi i tij duhet të rifillojë dhe një herë, atë që e cilësoi si një udhëtim. “3 Luanët” do të përballen me Hungarinë, në ndeshjen e vlefshme për kualifikueset e Botërorit 2022. Të besuarit e Southgate zhvilluan një Europian fantastik, ku pavarësisht humbjes në finale përballë Italisë, treguan se janë një pretendent i fortë për të fituar trofe në të ardhmen.
Southgate komentoi përpara përballjes:
“Skuadra ka fituar vetëbesim pas atyre që kanë arritur dhe progresit që kanë bërë. Por gjithsesi, duhet t’ia fillojmë nga e para. Udhëtimi për të patur dhe një herë të njejtën mundësi, në një kompeticion madhor ka nisur.”
Numri 1 i pankinës së “3 Luanëve” e konsideroi të rëndësishme përballjen me Hungarinë, duke e cilësuar atë si një test:
“Mentalisht është një test i mirë për ne. Larg shtëpisë, 60, 000 fansa dhe një skuadër shumë e mirë me të cilën do të përballemi. Duhet të jemi në më të mirën tonë…
Mendoj se të dyja ndeshjet në transfertë këtë javë do të jenë mjaft sfiduese. Kemi të bëjmë me skuadra të mira. Padyshim që janë ndeshje kyç përsa i përket kualifikimit.”
Ndërkohë nga ana tjetër, Federata Hungareze e Futbollit po përballet me sanksione nga UEFA, për shkak të thirrjeve raciste të tifozëve të tyre gjatë Europianit. Duke qenë se lojtarët e Anglisë u përballën me një valë të madhe abuzimi dhe fyerjesh raciste online gjatë Euro 2020, Southgate u pyet mbi qëndrimin që do të mbajnë futbollistët e tij nëse kjo gjë ndodh sërisht:
“Ne gjithmonë përgatitemi si skuadër për gjithçka. Nuk mendoj se duhet të flasim hipotetikisht. Po shkojmë në Hungari të përgatitur për një tifozeri që do të mbështesë skuadrën e tyre. Gjithçka tjetër është një spekullim.”
