Mesfushori i kombëtares angleze, Jordan Henderson, është shprehur se transferimi i tij tek arabët e Al-Ettifaq, erdhi dhe si pasojë e faktit se nuk ndihej më i dëshiruar në Anfield. Henderson iu bashkua Liverpool në vitin 2011 nga Sunderland, dhe zhvilloi plot 492 paraqitje me “The Reds”, duke fituar Premier League, Champions League, EFL Cup dhe FA Cup.
Megjithatë, pozitat e tij në klub filluan të lëkundeshin që sezonin e kaluar, kur lojtari nuk ishte më rregullisht titullar në skuadrën e Jurgen Klopp. Ardhja në klub e Dominik Szoboszlai dhe Alexis Mac Allister gjatë merkatos së verës ishte një tjetër tregues se situate nuk do të ndryshonte edhe në sezonin e ri, dhe Henderson e ka konfirmuar për herë të parë këtë gjë. Anglezi u shpreh:
“Nëse dikush te Liverpool do të më thoshte se donin që unë të qëndroja, nuk do të ishim duke bërë këtë bisedë. Nuk dua të them se ata po kërkonin të më hiqnin me forcë apo të largohesha nga klubi, por në asnjë pikë nuk u ndjeva i dëshiruar nga klubi apo kushdo tjetër për të ndenjur.”
Ndërkohë, Henderson, ashtu si dhe shumë lojtarë të tjerë, është kritikuar për lëvizjen e tij drejt Arabisë Saudite. Sipas disa raportimeve, anglezi thuhet se paguhet deri në 700 mijë paundë në javë tek Al-Ettifaq. Pavarësisht se mesfushori e ka mohuar këtë shifër, shumica e fansave vazhdojnë të akuzojnë lojtarin se zgjedhja për të luajtur për klubin arab, ishte më së shumti e nxitur për motive financiare. Henderson komentoi:
“Njerëzit mund të më besojnë ose jo, por në jetën dhe karrierën time, paraja nuk ka qënë asnjëherë qëllimi. Asnjëherë.”
Megjithatë, Henderson ka pranuar se lëvizja drejt Arabisë Saudite, mund të ndikojë tek e ardhmja e tij në kombëtaren angleze, duke qënë se roli i titullarit nuk është më i garantuar.