Pavarësisht dëmtimit në shpatullë të marrë në sfidën ndaj Newcastle, sulmuesi i Liverpool, Darwin Nunez, mund të aktivizohet në sfidën e “The Reds” përballë Real Madrid në Champions League. Lajmi është konfirmuar nga vet trajneri Klopp, i cili ka informuar gazetarët në prag të përballjes spektakolare me madrilenët në Anfield. Tekniku gjerman u shpreh:
“Ekziston një mundësi (që Nunez të aktivizohet), duhet të shohim sesi do ta përballojë dhimbjen.”
Sulmuesi ka shënuar 11 gola në të gjitha kompeticionet për Liverpool, që prej afrimit të tij nga Benfica në verë. Ai u dëmtua në një përplasje me Kieran Trippier, në sfidën që Liverpool fitoi përballë Newcastle me rezultatin 2-0.
Klopp ndërkohë ka folur dhe mbi rëndësinë e sfidës ndaj Real, duke kujtuar finalen e sezonit të kaluar, ku Liverpool u mposht pikërisht nga Real Madrid me rezultatin minimal 1-0. Klopp tha:
“E pashë përsëri ndeshjen (finalen) këtë fundjavë. Kuptova se përse nuk e kisha parë më parë. Ishte torturë, luajtëm një ndeshje të mirë, mund ta kishim fituar por ishin ata që shënuan golin deçiziv. Mund të dalloje eksperiencën e tyre, se sa pak e humbisnin konfidencën dhe ishin gati për të shfrytëzuar mundësitë. Kjo është ajo që mund të mësosh prej tyre. Kësaj rradhe jemi ekipe të tjera në kohë të tjera. Le të shikojmë se kush kalon kësaj rradhe.”
Klopp u shpreh i lumtur për momentin në të cilin ndodhet Liverpool, duke iu referuar dy rezultateve të fundit pozitive. Sipas teknikut gjerman, kjo është mjaft e rëndësishme në përballjen me Real Madrid, dhe ndeshja do të dukej ndryshe nëse do të luhej para 1 muaji.
Ndërkohë, ish-trajneri i Liverpool dhe Real Madrid, Rafael Benitez, u shpreh se anglezët kanë potencialin e duhur për t’u përballur me Real. Sipas spanjollit, “The Reds” kanë fituar eksperiencën e duhur në Champions League, për të përballuar më mirë presionin.