Trajneri i Liverpool, Jurgen Klopp, ka thënë se i takon Mohamed Salah të vendosë nëse do të rinovojë apo jo me “The Reds”. Kontrata e Salah skadon në fund të sezonit të ardhshëm dhe megjithëse egjiptiani ka shprehur dëshirën se do të qëndrojë në Anfield, ende nuk ka një marrëveshje konkrete mes tij dhe klubit.
Jurgen Klopp ka komentuar së fundmi për situatën e sulmuesit:
“Mo patjetër pret që Liverpool të jetë ambicioz, dhe ne jemi. Tani është vendimi i tij. Klubi ka bërë gjithçka ishte e mundur dhe kjo është situata. Nuk ka asgjë për t’u thënë, është gjithçka në rregull. Nga këndvështrimi im, çdo gjë është ekzaktësisht si duhet të jetë në këtë moment. Nuk ka ndodhur ende asgjë, asnjë refuzim, asnjë rinovim apo diçka e tillë. Pra thjesht duhet të presim.”
Salah iu bashkua Liverpool nga italianët e Romës në vitin 2017. Ai ka shënuar 152 gola deri më tani në 237 paraqitje me “The Reds”. Kontributi i tij ka qënë mjaft i rëndësishëm për ekipin e Klopp, që me ndihmën e egjiptianit ia ka dalë të triumfojë në Premier League, Champions League, League Cup, Fifa Club World Cup dhe UEFA Super Cup.
Legjenda e Liverpool, John Barnes, ka thënë se anglezët duhet të tregohen të kujdesshëm me propozimin financiar që do t’i ofrojnë Salah. Sipas Barnes, një pagë e lartë mund t’i hapë probleme Liverpool në të ardhmen. Kjo pasi Salah ka shprehur dëshirën për të mbyllur karrierën me Liverpool. Pra nëse futbollisti rinovon, kjo do të jetë për një afat të gjatë, me shumë mundësi 5-vjeçar, dhe klubi do të duhet t’i paguajë lojtarit të njejtën page, edhe nëse forma e tij në të ardhmen nuk e justifikon atë.
Kjo gjithashtu do t’i hapte probleme Liverpool për të sjellë një tjetër emër në vend të tij, duke qënë se mundësitë financiare do të jenë të kufizuara.