Mesfushori i Manchester City, Kalvin Phillips, është shprehur se së shpejti do të marrë një vendim mbi të ardhmen e tij tek “qytetarët”. Që prej transferimit nga Leeds, Phillips ka dështuar të gjejë hapësira në ekipin e Pep Guardiolës. Këtë sezon, mesfushori është paraqitur vetëm 3 herë, si zëvëndësues. Pavarësisht këtij fakti, Kalvin ishte pjesë e kombëtares angleze në fitoren 3-1 ndaj Italisë. Në përfundim të takimit, ai u shpreh:
“E di se duhet të luaj ndeshje dhe të konkurroj cdo fundjavë. Duhet të marr një vendim mbi të ardhmen tim në muajt e ardhshëm. Ai (Gareth Southgate) më thotë se që të ruaj vendin tim në kombëtare duhet të luaj ndeshje. Kjo është ajo që dua të bëj. Jam dakord me Gareth në këtë pjesë.”
Phillips shtoi:
“Dua të luaj futboll dhe të luaj sa më shumë të jetë e mundur. Përgjatë vitit të kaluar nuk kam qënë në gjendje ta bëj këtë për shkak të dëmtimeve dhe faktorëve të tjerë. Kjo është dicka për të cilën më duhet të mendohem. Shpresoj që shansi im të vijë, por nëse nuk vjen atëherë më duhet të marr vendime të tjera.”
Gjithsesi, shancet që Kalvin të rifitojë vendin e tij si titullar tek City, apo thjesht të marrë më shumë minuta loje duken të pakëta. Trajneri Guardiola kritikoi mesfushorin pas rikthimit të tij nga botërori i Katarit, teksa deklaroi se Phillips ishte kthyer mbipeshë në përfundim të kompeticionit.
Ndërkohë, mesfushori i City gjithashtu u aktivizua si zëvëndësues në sfidën miqësore të Anglisë ndaj Australisë, ku “3 luanët” fituan me rezultatin minimal 1-0. Anglia u kualifikua në europianin e vitit të ardhshëm. Mbetet të shohim nëse Phillips do të ruajë pozitat e tij si i preferuar i Southgate, pavarësisht mungesës së minutave të luajtura këtë sezon.