Ylli i PSG dhe kombëtares argjentinase, Leo Messi, ka thënë se Botërori i Katarit që do të startojë në nëntor, do të jetë me siguri i fundit për të. Messi ka luajtur në 4 botërore të ndryshme, duke arritur të shënojë 6 gola dhe 5 asiste në 19 paraqitje gjithsej.
Në 2014-ën “pleshti” humbi finalen e madhe përballë Gjermanisë, dhe Kupa e Botës është i vetmi trofe që mungon në karrierën e tij të jashtëzakonshme. Kujtojmë se sulmuesi 35 vjeçar triumfoi në Copa America me Argjentinën vitin e kaluar. Në një intervistë për ESPN, Messi u shpreh:
“Ky do të jetë Botërori im i fundit, me siguri. Po numëroj mbrapsht ditët për Kupën e Botës. Ka ankth dhe nerva në të njejtën kohë. Dëshira për t’i luajtur ndeshjet që tani, pikëpyetjet se çfarë do të ndodhë, dhe si do të përfundojë në fund. Në Botëror gjithçka mund të ndodhë. Të gjitha ndeshjet janë shumë të forta. Favoritët nuk fitojnë gjithmonë.”
Messi shtoi:
“Nuk e di nëse ne jemi favoritët, por Argjentina është gjithmonë një kandidate për shkak të historisë së saj. Tani akoma dhe më shumë për shkak të momentit ku jemi, por nuk jemi favoritë. Mendoj se ka ekipe të tjera që janë sipër nesh.”
Messi bëri debutimin e tij profesionist me Argjentinën në vitin 2005. Që prej atij momenti, sulmuesi i PSG ka shënuar plot 90 gola në 164 paraqitje me kombëtare. Botërori i Katarit do të jetë i pesti për argjentinasin, dhe kjo do të thotë se ai do të thyejë rekordin e tij të mëparshëm, që e ndante dhe me Diego Maradona dhe Javier Mascherano.
Në renditjen e kombëtareve të FIFA, Argjentina mban vendin e tretë. Messi me shokë janë pjesë e grupit C në Botëror, dhe do të luajnë përballë Meksikës, Arabisë Saudite dhe Polonisë.
