Trajneri i Arsenal, Mikel Arteta, ka thënë se ekipi i tij duhet të forcohet në këtë merkato, nëse do të konkurrojë për titullin kampion në Premier League. Londinezët u mposhtën nga Manchester City sezonin e kaluar, pavarësisht se kryesuan renditjen për pjesën më të madhe të sezonit. Ekipi është linkuar me transferimin e mundshëm të Declan Rice nga West Ham, ndërkohë që Kai Havertz i Chelsea është shumë pranë zyrtarizimit.
Arteta ndërkohë ka komentuar:
“Sezoni i ardhshëm do të jetë kampionati më i fortë në historinë e Premier League. Përse? Sepse ishte i tillë që vitin e kaluar. Kam qënë këtu (në Angli) prej 22 vitesh dhe nuk kam parë asnjëherë një nivel konkurrence të tillë. Kaq shumë kualitet, kaq shumë organizim, kaq shumë resurse, kaq shumë trajnerë të mirë. Ky është niveli dhe për të fituar Premier League duhet të jesh më i miri. Prandaj duhet të forcohemi.”
Tekniku i Arsenal shtoi:
“Edhe kësaj dite ende më dhemb fakti që nuk fituam dot Premier League pas 10 muajsh betejë me City. Patëm 3 ose 4 dëmtime të lojtarëve të rëndësishëm dhe prej atij momenti gjërat u komplikuan. Kur kishim ekipin e plotë ishim konsistentë. Sapo erdhën problemet, atëherë nuk bëmë dot mjaftueshëm. Kundërshtarët tanë ishin ekipi më i mirë në botë, me trajnerin më të mirë në botë. Nuk kishim zgjedhje përveç se të pranonim disfatën dhe t’i jepnim dorën kampionëve.”
Sipas mediave angleze, Mikel Arteta është duke lobuar fort tek bordi drejtues i Arsenal, për afrimin e lojtarëve cilësorë. Tekniku spanjoll është i besimit se klubi ka ende nevojë për përforcime në disa reparte të rëndësishme të fushës si mesfusha. Për këtë arsye, Arteta po insiston që Arsenal të tregohet sa më agresiv dhe i shpejtë, në përmbushjen e objektivave të veta në merkato.
