Ish-sulmuesi i Chelsea, Pat Nevin, ka thënë se Raheem Sterling as nuk konsiderohet nga trajneri Southgate, për të qënë pjesë e përfaqësueses angleze në Kupën e Botës. Sterling nuk ka shënuar për blutë e Londrës që prej muajit gusht, dhe u zëvëndësua pas një ore lojë nga trajneri Potter, në sfidën ndaj Brighton që Chelsea humbi në mënyrë surprizë në shifrat 4-1. Trajneri Potter “mbrojti” performancat në hije të Sterling së fundmi, por Nevin ka një mendim tjetër për formën e sulmuesit. Ish-lojtari i Chelsea u shpreh:
“Kam parë Raheem Sterling këto ditë, dhe mund të them se Graham Potter ka marrë më të mirën nga secili lojtar, që prej momentit që erdhi në klub, me një përjashtim të vetëm (Sterling). Nëse ai vazhdon të luajë ashtu si po luan tani, as nuk do të konsiderohet për një vend në Kupën e Botës.”
Trajneri Southgate ka kohë deri në 13 nëntor për të dorëzuar listen e tij finale, me lojtarët e përzgjedhur për Botërorin e Katarit. Sterling ndërkohë ka shënuar 19 herë në 79 paraqitje me kombëtaren e “3 Luanëve”. Sulmuesi shënoi 3 herë në Europianin 2020, dhe ishte pjesë e ekipit më të mirë të kompeticionit. Megjithatë, duket se që prej transferimit nga Manchester City drejt Chelsea, Sterling e ka pasur të vështirë të përshtatet dhe të gjejë formën e tij më të mirë. Kjo vërtetohet dhe nga statistikat e ndeshjes me Brighton, ku lojtari e preku topin vetëm 35 herë, si dhe e dorëzoi atë tek kundërshtari 18 herë.
Trajneri Potter ndërkohë u shpreh për Sterling:
“Ai ka fleksibilitetin, aftësinë dhe kualitetin për të luajtur në disa pozicione. Duhet të mundohesh gjithmonë të gjesh balancën dhe zgjidhjet e duhura. Si një skuadër, ne mund të bëjmë më mirë. Nëse luajmë më mirë si skuadër, individët do të përfitojnë gjithashtu…”
