Trajneri i Manchester City, Pep Guardiola, është shprehur se Arsenal do të jetë dhe këtë sezon, një nga ekipet pretendente për titullin kampion në Angli. Skuadrat do të përballen me njëra-tjetrën ditën e diel, në një ndeshje që mund të rezultojë mjaft e rëndësishme përsa i përket garës për vendin e parë në Premier League.
Manchester City u mposht nga Wolves në ndeshjen e kaluar në kampionat, por për momentin ndodhet 1 pikë para Arsenal në renditjen e përgjithshme. Guardiola ka komentuar:
“Ata (Arseal) ishin rivalët tanë më të mëdhenj sezonin e kaluar, dhe do të jenë përsëri aty për një kohë të gjatë. Ata janë përsëri favoritë, së bashku me Liverpool. Për të analizuar ekipet favorite mund të shohësh 10 ndeshjet e para. Ekipet e mëdha janë gjithmonë pretendentë për titullin kampion.”
Tekniku spanjoll shtoi:
“Arsenal është rikthyer. Kur isha ende një djalosh i ri dhe sapo kisha startuar karrierën si trajner tek Barcelona, mbaj mend se ata rivalizuan Manchester United e Sir Alex Ferguson. Më pas për shumë vite nuk ishin në atë nivel, por tani janë rikthyer. Kur shikon kalendarin dhe sheh se do të shkosh në Emirates e di se është një përballje e vështirë.”
Megjithatë, pavarësisht elozheve të Guardiolës ndaj rivalëve londinezë, Arsenal është mposhtur në 12 përballjet e fundit në kampionat ndaj “qytetarëve”. Megjithatë, të besuarit e trajnerit Arteta mposhtën City në finalen e Community Shield, pas goditjes së penalltive.
Arteta ndërkohë gjithashtu ka komentuar mbi përballjen me City:
“E vetmja gjë për të cilën jam i shqetësuar është kualiteti i kundërshtarëve. Të dielën duhet të jemi në formën tonë më të mirë për 100 minuta. Kjo është ajo që duhet të kontrollojmë dhe aty duhet të fokusohemi. Në këto ndeshje të mëdha duhen lojtarë të mëdhenj të cilët bëjnë diferencën.”