Trajneri i Manchester City, Pep Guardiola, ka thënë se ekipi i tij duhet të jetë “gati perfekt” nëse kërkon të kapë kryesuesit e Arsenal në Premier League. Nëse “qytetarët” arrijnë të fitojnë ndaj Chelsea ditën e nesërme, diferenca mes tyre dhe Arsenal në renditje do të jetë vetëm 5 pikë. Kjo pasi të besuarit e Mikel Artetës barazuan pa gola në sfidën e tyre ndaj Newcastle.
Guardiola u shpreh:
“Ata (Arsenal) do të grumbullojnë 100 ose më shumë pikë nëse vazhdojnë të luajë si kanë luajtur deri më tani. Nëse vazhdojnë në këtë mënyrë, nuk do mundemi t’i kapim dot. Duhet të jemi gati perfektë do të thoja, nga tani e deri në fund të sezonit, dhe të shpresojmë se ata do të humbasin disi në performancën e tyre, sepse dje ndaj Newcastle ishin ekselentë. Do të shohim se çfarë do të ndodhë.”
Trajneri spanjoll shtoi:
“Do të jetë një ndeshje e vështirë, përballë një ekpi të fortë, të menaxhuar mirë. Stamford Bridge, çfarë mund të them…Nuk ka rëndësi se në çfarë pozicioni je në renditje kur udhëton atje, është gjithmonë e vështirë. Por në të njejtën kohë, po mirëpresim këtë javë dhe javën tjetër, për kompeticionet e ndryshme, dhe sidomos Premier League.”
Këtë muaj ekipi i Pep Guardiolës do të përballet me Southampton në sfidën e vlefshme për Carabao Cup, si dhe me United dhe Tottenham në kampionat. Këto sfida do të jenë mjaft të rëndësishme përsa i përket garës për titull kampion, duke marrë parasysh se City do të luajë dhe 2 ndeshje direkte ndaj Arsenal, rezultati i të cilave është i vështirë të parashikohet.
Guardiola ndërkohë gjithashtu bëri të ditur se mbrojtësi Ruben Dias nuk do të jetë i disponueshëm në sfidën ndaj Chelsea.
