Trajneri i Manchester City, Pep Guardiola, është shprehur se klubet saudite kanë ndryshuar merkaton e futbollit, dhe klubet elitare europiane duhet të jenë të ndërgjegjshme për atë që po ndodh. Pas afrimit të Cristiano Ronaldo në dhjetor, liga arabe ka tërhequr dhe një sërë emrash të tjerë të njohur në arenën e futbollit europian. Lëvizja më e fundit është ajo e Riyad Mahrez, i cili la Manchester City për t’iu bashkuar Al-Ahli. Guardiola ndërkohë është shprehur:
“Arabia Saudite ka ndryshuar tregun. Para disa muajsh, kur Cristiano ishte i vetmi që u largua, askush nuk mendonte se kaq shumë lojtarë të kalibrit të lartë do të luanin në kampionatin saudit. Në të ardhmen do të ketë më shumë lojtarë dhe prandaj duhet që klubet (europiane) të jenë të ndërgjegjshëm për atë që po ndodh.”
Guardiola shtoi:
“Ata (drejtuesit e kampionatit arab) duan të krijojnë një kampionat të fortë, dhe deri më tani ata janë liga që mund ta bëjë… Tani për tani, nuk e di për sa kohë Arabia Saudite do ta përballojë, por ndjesia që kam është se do ta bëjnë. Lojtarët duan të shfrytëzojnë këtë mundësi për të luajtur në atë kampionat, dhe do ta bëjnë.”
Në lidhje me largimin e Riyad Mahrez, tekniku spanjoll u shpreh se City nuk do të kërkojë menjëherë për një zëvëndësues. Guardiola tha se klubi nuk po kërkon për një lojtar si Mahrez, pasi përsa i përket aftësive, të gjithë futbollistët janë të ndryshëm.
Kujtojmë se nga City u largua gjithashtu dhe mesfushori Ilkay Gundogan, i cili zgjodhi t’i bashkohet Barcelonës. Ndërkohë, mbrojtësi hollandez Nathan Ake ka firmosur një rinovim kontrate me klubin, deri në vitin 2027. Ake u shpreh mjaft i lumtur duke vlerësuar dhe trajnerin Pep Guardiola, si teknikun më të mirë në futboll dhe një gjeni.
