Trajneri i Manchester City, Pep Guardiola, është shprehur se ekipi i tij ka ende gjëra për të përmirësuar, pas fitores 5-3 në miqësoren ndaj Yokohama F Marinos në Japoni. Trajneri i “qytetarëve” gjithashtu vlerësoi formën e sulmuesit Erling Haaland, duke thënë se bomberi norvegjez është në formë më të mirë fizike se sezonin e kaluar. Guardiola u shpreh:
“Ishte një test i mirë pasi nuk kishim shumë përgatitje. Yokohama luajti shumë mirë në tranzicion, gjë që na bëri mirë dhe ne. Sigurisht, mund të përmirësojmë shumë gjëra, rëndësi ka dhe që nuk patëm asnjë të dëmtuar. Tani do të pushojmë dhe do të përgatitemi për sfidën ndaj Bayern Munich.”
Manchester City do të përballet me Bayern Munich në një ndeshje miqësore interesante. Kjo do të jetë përballja e parë mes 2 ekipeve, pas asaj në Champions League sezonin e kaluar. Ndërkohë në lidhje me Erling Haaland, Guardiola komentoi:
“Në krahasim me sezonin e kaluar ai është më në formë. Ai është në formë më të mirë sesa kur erdhi sezonin e kaluar. Do të donim shumë që të kishte të njejtën formë. Haaland nuk është i dëmtuar, gjë mjaft e mirë, por është ende larg formës optimale si të gjithë të tjerët. Ai e di se çfarë duhet të bëjë, dhe dihet se për disa javë ai do të jetë në një formë fizike më të mirë sesa tani.”
Bomberi norvegjez theu rekordin për golat e shënuar në një sezon në Premier League, në sezonin e tij të parë me City. Haaland realizoi 36 gola në kampionat, dhe plot 52 në të gjitha kompeticionet. Kontributi i sulmuesit ishte mjaft i rëndësishëm në suksesin e City, që fitoi tripletën, duke u bërë ekipi i dytë anglez pas Manchester United, që realizon këtë arritje madhore.