Në një intervistë të fundit për shtyp, Pep Guardiola ka thënë se Manchester City nuk bëri asgjë speciale duke fituar vetëm 1 herë titullin kampion në Champions League. Sezonin që lamë pas, Manchester City u bë ekipi i dytë anglez në histori që ia ka dalë të fitojë tripletën e trofeve (Premier League, FA Cup, Champions League). Megjithatë, Guardiola ka zgjedhur të trajtojë me modesti arritjet e “qytetarëve”:
“Kësaj rradhe do të jetë më e lehtë (fitorja e Champions). Më e vështira për t’u fituar është gjithmonë e para. Fitorja e Champions League për klubin tonë është e jashtëzakonshme, por e vënë në prespektivë, sa ekipe kanë fituar një herë Champions League-ën? Shumë. Nuk kemi bërë asgjë speciale me vetëm një, por jemi shumë krenarë.”
Guardiola u pyet nga reporterët nëse e kishte parë përsëri ndeshjen e finales së vitit të kaluar ndaj Inter. Spanjolli u përgjigj:
“Nuk e kam parë ndeshjen, fare. Kisha ndjesinë se Inter ishte një ekip i fortë. Ata e provuan. Ishte një ndeshje e luftuar, dhe ata treguan sa të fortë janë, dhe janë kandidatë për ta fituar sërisht.”
Ndërkohë mbrojtësi i kombëtares angleze, Kyle Walker, gjithashtu duket se është i përqëndruar tek sfidat që City ka përpara. Anglezi komentoi:
“Ajo që kemi arritur është tashmë në të kaluarën, tani është një sezon i ri. Trajneri na vizatoi një diagramë ku ne ishim në fillim të një mali dhe duhet ta ngjisim atë. Të bësh këtë gjë përsëri është ajo që diferencon ekipet e mira nga ato të jashtëzakonshme.”
Dhe në fakt City e startoi mjaft mirë sezonin e ri në Champions League, me një fitore të pritur ndaj FK Crvena Zvezda me rezultatin 3-1. Pavarësisht se “qytetarët” pësuan gol të parët, edhe në disavantazh u duk se fitorja ishte thjesht çështje kohe. Autorët e golave për City ishin Alvarez me një dopietë dhe Rodri.